Isla Paraiso

Gula 41

Si Rey walay kalainan sa usa ka iring kumagat nga nakigsangka sa mga kaaway. Dagan-tago ang iyang gihimo. Matag karon ug unya modagan siya nga sama sa nagpaibog sa kaaway sa iyang pagpusil kaniya ug unya motago apan mogawas lang usab dayon sa gitagoan nga nagkablit na sa ginatilyo sa iyang hinagiban tumong sa mga kaaway. Ingon sa usa lang ka dula-dula alang kang Rey ang panagsangka.

Unya mikalit lang pagtang-on ang mga butobuto. Mibanos diha-diha ang kahilom sa dapit. Mingaw na kaayo. Taudtaod nga naniid ang kapolisan kun wala na ba gayo’y kaaway nga nahibilin.

“Men, search the area,” mimando si Rey sa iyang mga sakop sa dihang wala na gayo’y timik ang palibot. “Pag-amping kamo. Tingali’g may mga kaaway nga buhi pa ug nagpataypatay lang. Kasagaran na kana nga panglansis sa mga kriminal.”

Dihadiha milihok ang mga sakop ni Rey. Gisuhid sa mga tinugyanan sa balaud ang tibuok palibot sa beach. Nagpasad ang mga patay hangtod ngadto sa ngilit sa baybayon. Gitino sa kapolisan kun patay na ba gayod ang tanan nga nangligdas sa yuta -- may nakulob ug may nahayang ang posisyon.

Pagkataudtaod, namalik ang mga polis sa nahimutangan ni SPO3 Rey Corpuz.

“Sir,” miduol gilayon si Corporal David Benturada kang Rey. “Patay na ang tanan. Nagtuo kami nga walay usa nga nakaikyas sa mga kaaway.”

“Good,” matud ni Rey. “Mao kadto’y ilang gipangayo.” -- Sumpayan pa