Isla Paraiso

Gula 40

Mao kadto ang sinugdanan sa pinusilay tali sa puwersa sa kapolisan ug sa pundok sa mga tigpayuhot. Ang kamingaw sa dapit gisangag sa nagpungasing mga bala sa kamatayon. Daghan sa mga sakop sa sindikato ang mihay-ad sa yuta dihadiha.

Si Rey abtik nga milihok. Giseguro niya nga wala gayo’y usa sa mga kaaway nga makaikyas. Iyang gipusil kadtong usa ka kaaway nga nagbitbit og M-203 nga may grenade launcher. Nabuhian sa lalaki ang hinagiban nga gigunitan sa dihang naigo kini sa mga bala nga giluwa sa .45 kalibre ni Rey. Gidali sa batan-ong polis pagpunit ang M-203 ug dihadiha gikasa. May sulod na kining daan nga rifle grenade. Sa usa ka pagpamilok gi-release ni Rey ang rifle grenade nga giugom sa grenade launcher tumong sa lantsa nga nagpundo sa malinawong dagat dihadiha miulbo ang sakyanan sa kadagatan nga naigo sa gitira nga granada.

Karon gipahimuslan ni Rey pag-ayo ang higayon nga nakagunit siya’g taas nga hinagiban. Iyang gipaulbo ang mga cottage nga iyang gituohan nga gitagoan sa mga kaaway pinaagi sa rifle grenade. Ug kutob sa mga kaaway nga iyang makit-an giluthang niya.

Nagpadayon ang pinusilay. Wala gayod moangka ang mga tigpayuhot nga gikasangka sa kapolisan bisan og nag-anam na sila’g kadiyotay. Natibhangan na ang ilang gidaghanon; daghan na kanila ang napatay sa tinugyanan sa balaod. Apan misukol gihapon sila sa kapolisan.-- Sumpayan pa