Naa apan wa

“Gaw, pasensiya ka na sa regalo. Nahibilin sa laing sakyanan”, ni Brando ngadto’s iyang ig-agaw nga si Conrad, amahan sa bride. Nagkahinabi sila human sa panihapon nga maoy hikay sa kasal. Nia ang reception gisaulog sulod sa Fort San Pedro sa wa pa nahitabo ang linog.

Engrande ang kasal nilang Maricor ug Saul. Trese ka parisan ang principal sponsors. Daghan kaayong mga bisita. Nalukop gyud sa lamesa ang tibuok hawanan nga gilibutan sa mga paril sa Fort San Pedro.

Mahulog gyud nga best friend o best cousin ni Conrad si Brando. Kay katalirungan sila. Ug sila gyud ang nagkahugoyhugoy sukad sa pagkabata. Nagkabuwag lang sila’g kuyogkuyog dihang lainlaing na ilang mga trabaho. Ug nisamot dihang nangaminyo na. Duna lang gyud hinooy pagkatihik ning ig-agaw ni Conrad. Apan angayan man gyud nga magtinihik siya kay may ambisyon man nga madatu. Gani iyang mga anak, puro na minyo. Ug puro na namuyo sa abroad. Kasamtangang gilihok iyang papeles aron makaapas sa iyang kinamaguwangang anak ngadto sa Amerika. Apan mao lagi, tungod sa katihik, dalihan na lang og bulatik.

“May lain pa mang panahon, Gaw. Tungod sa kadaghan nimo’g sakyanan, maglibog ka’g haing sakyanana gibutang imong para regalo, puwede man ipasugo nimo’g tawo. Ipaapas lang kun tinood man gyud nga duna kay regalo giandam” ni Conrad.

Namid-ok lang iyang ig-agaw. Wa nisumpay. Ug gilain ang istorya.

“Puwede ra man unta’g di moregalo. Apan kanang mobolatik nga may regalo, apan wa lang madala, mas makalagot. Mas maayo pa, di lang mohisgot. Unsa may pulos anang mohisgot ka nga naa, unya wa diay?!” tuaw ni Conrad sa hilom. Nihilom na lang siya’g biya sa lamesa sa ig-agaw ug niduol og laing lamesa. (Katapusan)