Wala’y hunahuna

Dear Tita Salie,

Hello! Ako si Mr. Rinzo. Ug ikaduha na kining problema nga akong gipadala kanimo. Ganahan man gud ko magpatambag nimo, Tita, kay klaro gyud kaayo ang imong tubag ug prangka  kaayo ka.

Ang akong problema kabahin kini sa akong uyoan nga igsoon sa akong mama. Dihang namatay ang iyang asawa mipauli siya sa iyang mama ug akong lola diin anaa usab kini nagpuyo. Tungod lagi kay wala pa siya’y income, busa amo unang gibuhi ang iyang pamilya apil ang iyang mga anak kay pareho man silang wala’y trabaho.

Karon, Tita Salie, nakatrabaho na kining akong uyoan apan mao lang gihapon nagpabuhi lang gihapon namo. Wala gyod siya maghunahuna bisan na lang unta sa pagpalit og bugas aron dili na bug-at alang kanamo. Naa pay iyang anak nga nagsige lang og inom ug mouli lang aron mukaon.

Tungod niini kanunay lang awayon ang akong uyoan sa iyang mga igsoon. Unsa may angay namong buhaton, Tita, aron mabut-an ang among uyoan? Palihog pasabta ko. Thank you very much.

* * *

Maayong adlaw. Mapasalamaton kaayo ko og dako nga ganahan mo ug nalingaw niining atong lindog. Manghinaut lang ko nga inyo kanunay nga hinumdoman ug puy-an ang mga maayong prinsipyo sa kinabuhi nga akong gipaambit kaninyo.

Mao gyod kini ang matuod nga sitwasyon kun daghan kita nga nagtipon pagpuyo sa usa ka panimalay. Dili gyud nato kalikayan nga dili nato magustohan ang batasan sa uban bisan pa man kun sila atong mga kadugo ug uyoan. Kay ang uban magsalig nga dunay mupalit sa ilang pagkaon ug makalimot na lang sa pagkuot sa ilang bulsa aron mutabang sa mga gastohan sa balay. Adunay uban nga dili makalimot apan kusog kaayong magpabaga sa nawong ug dili gyud mutabang ug maoy iyang gusto nga permi lang siyang lawgan.

Busa angay sa ingon niining sitwasyon kinahanglan gyod ang sabot-sabot sa tanang miyembro sa pamilya ug estoryahan ang maong isyu.

Imong estoryahan niini ang imong lola kun kaya pa niyang makasulti. Since iya mang anak ang imong uyoan, busa siya ang angayan nga mosulti. Mas maayo nga iyang i-meeting kamong tanan aron sabotan ang gastohan aron wala’y bagulbol nga madungog ug anaa ang kahiusa sa inyong pagpuyo. -- Tita Salie