Isla Paraiso

Nabatian ni Rey nga nagkaduol na sa baybayon sa beach resort ang andar sa makina sa lantsa. Hugot ang iyang pagtuo nga ang maong sakyanan sa kadagatan mao na ang gikargahan sa mga kontrabando nga gireport kanila sa intelligence. “Pangandam kamo,” iyang giingnan ang iyang mga sakop. “Kinahanglang wala’y usa kanila nga makaikyas. Ang dili moampo nga malinawon atong pusilon.”

Mikalit pagpanghupo ang mga polis sa kasagbotan sa dihang kalit misiga ang mga sugang dagitabnon sa sulod sa beach resort. Nagsiga na usab ang mga suga sulod sa upat ka cottage. Tulo ka suga ang gipasiga sa gawas nga maoy nagsabwag og kahayag sa hawanan. Ang ubang mga polis mipasalipod sa mga punoan sa lubi ug ang uban mipasalipod sa mga cottage  nga nahilayo og diyotay sa upat ka cottage nga gisug-an.

Dihadiha nanggimok, daw mga ilaga sa kagabhion, ang mga tawo nga nanggawas gikan sa cottage. Mga armado sila. Nakita kaayo sila sa kapolisan nga gipangulohan ni SPO3 Rey Corpuz, apan wala una sila pabuthi sa mga tinugyanan sa balaod. Ang matag usa ka sakop naghulat sa mando ni Rey. Gisunod gayod sa kapolisan ang plano nga ilang gikasabotan.

Ang mga tawong armado nagkatagkatag sa palibot sa cottage. Wala lamang sila’y kalibotan nga may mga polis na nga nakasulod sa ilang nahimutangan. Ang kapolisan naghulat na lang sa tukmang higayon sa pag-atake. -- Sumpayan pa