Ang silingan nga abogado

Tagsa ray motoo sa usa ka propeta kun anha siya magsangyaw sa iyang mga silingan. Mao ni ang pulong ni Jesukristo. (Hisgutan sab nato Siya kay hapit na iyang birthday). Tinuod gyud kaayo ni. Apan dili kay sa propeta lang. Hapit tanang kaalam. Ma-propesyonal o dili. Sama sa doctor o abogado. Kasagarang silingan, dili gyud patambal o palaban sa ilang silingan. Samot na kun albularyo. Kasagarang mga pasyente sa usa ka albularyo, taga lagyong lugar.

Mao sab ang  pasyente sa doctor. Ug mga klieyente sa abogado. Tungod man god na kay tawhanon man lang ta. Dili ta mosalig sa tawo nga nasinati na kaayo nato ang kinabuhi, lakip na ang iyang mga depekto sa kinaiya, sa panglawas ug panghunahuna.

Apan may usa ka silingan nga napugos pagpangunsulta sa iyang silingang abogado. Kay wa na siya kapaingnan. Giabandonar siya’s iyang abogado. Unya gitambagang paduolon sa PAO. Nakabayad na ra ba siya’g P300,000 isip acceptance fee.

“Nidaug na mi’s kaso, Fred (nag-Fred lang kay silingan lagi ni Atty. Freddy Luhag). Duha ka kaso ang gisang-at sa akong bana. Kay gidasmagan siya’g sakyanan. Unya ang drayber nisirit lang. Serious physical injuries TRI ug abandonment of victim. Konbiktado ang akusado. Unya, niingon lang among abogado, daug na man ta, human na akong serbisyo. Pangita na lang mo’g abogado sa PAO aron mopapriso sa akusado ug mopabayad sa inyong danyos,” ni Lita nga sa tin-edyer pa sila nakapangulitawo si Fred niya. Apan wa sugta.

“Kumusta na man imong bana?” ni Fred. “Nabarda gyud og gamay. Magsaguyud ang walang tiil kun maglakaw. Kay maayo mang pagkabali. Unya wa man matarong og opera sa ospital,” ni Lita. “Matawag ka nga abandonado de abogado. Mora’g napalit sa pikas inyong abogado. Papirmaha siya’g formal letter or motion of withdrawal. Kun naa na, ako na lay pasaka og motion sa husgado nga ipaimplementar nato ang sentensiya sa akusado,” ni Fred. “Pila may among bayranan unya nimo, Fred?” ni Lita. “Libre akong serbisyo basta Disyembre. Pinaskohan labi na’s mga silingan,” ni Fred. Mapahiyomon.

“Salamat kaayo, Fred ha!” ni Lita. Nakahapak og ahat sa abogadong silingan. “Uy! Nganong wala ka man nagminyo?” dugang ni Lita. “Secret” ni Fred. Nagpahiyom gihapon.

Nigawas si Lita sa balay sa abogado nga may dakong pagmahay. “Maayo pa siya na lay gipagunit sa kaso. Di unta mi hidak-an og bayad sa acceptance fee,” tuaw ni Lita sa hilom. “Apan mao lagi, mahadlok sab ko magselos si Jack,”  dugang niyang tuaw. (Kataposan)