Textmate

Gula 5

Wala makatingog si Linda diha nga giagbayan siya ni Dante. Mora siya og nahimong amang ilabi na nga sa hilom nakagusto usab siya ni Dante.

Wala masayop si Linda sa iyang katahap nga hitsuraan si Dante tungod kay pilian man kaayo kini’g babaye. Mao kini ang rason nga gihatag ni Dante nga dugay kini nga nagminyo sa iyang asawa nga nahimong inahan karon sa duha nila ka anak.

Bisan og daw nalukmay si Linda sa pag-agbay kaniya ni Dante, apan nakabaton ra siya og kaisog sa pagpangutana sa iyang textmate kun ngano nga nagluib man siya sa iyang asawa sama karon nga nakigpanan-aw kini’g sine sa laing babaye.

Mora’g natuk-an si Dante sa pagkadungog sa pangutana ni Linda. Wala siya magpaabot nga pangutan-on siya ni Linda sa mao nga pangutana. Apan dali ra siya nga nakahuna-huna og tubag ngadto kang Linda.

“Tawo ra man gud ta Lin, dali ra kaayo nga matintal ilabi na kun makakita ko’g babaye nga sama kanimo nga usa ka gwapa,” matud ni Dante nga mianam na sa paggakus ni Linda. “Sayod ko nga ikaw Lin, gimingaw ka na ‘sab sa pagpangga sa usa ka lalaki kay matud mo dugay ka na nga wala modawat og boyfriend,” matud ni Dante.

Mipahiyom si Linda ngadto kang Dante. Wala na magpaabot og laing higayon si Dante, iya dayon nga gipatikan og hawok ang aping ni Linda. Wala na g’yud sila mahinultol sa pagtan-aw sa salida nga ila unta nga tan-awon. Wala motingog si Linda nga gihagkan ni Dante ang iyang aping.

 Gihapuhap ni Dante ang abaga ni Linda ug ang paghapuhap ni Dante anam-anam nga midailos ngadto sa kilid ni Linda. “Grabe na man kini kaayo Dan, makahandom man lang ‘sab ko niadto sa akong boyfriend nga mohapuhap kanako,” ni Linda pa.

Gigunitan ni Dante ang suwang ni Linda ug anam-anam niya nga gipaduol ang iyang mga ngabil ngadto sa mga ngabil sa maanyag nga text mate.

Sa unang higayon nag-akob ang ilang mga ngabil ug daw gidimdim nila ang katam-is sa pagminahalay. Gigakus na gayud ni Dante si Linda samtang wala lung-i sa pag-ukob ang mga ngabil niini.

Suheto na kaayo si Linda nga makig-lips to lips sa lalaki. Pareho na sila’ng duha nga daw anam-anam na nga giganoy sa langit tungod sa kalalim sa ilang gihimo. Mora’g mihangos si Dante ilabi na kay daw nalubag ang iyang lawas nga migakus ni Linda samtang giuwang sila sa divider sa lingkoranan.

“Hain ang maayo kun mangadto ta’g dapit nga wala’y makatugaw kanatong duha Lin. Maayo didto kay tagbawon g’yud nato ang atong kaugalingon,”giingnan ni Dante si Linda. - Sumpayan