Angay gayod handumon ang kagahapon

Nagkita sila si Ella ug Ber sa usa ka beer house didto sa siyudad sa Sugbo, niadtong panahon nga nagtungha pa si Ella sa University of the Visayas, usa ka inilang unibersidad nga pribado. Para
kang Ber, maanyag si Ella ug iya karong gipangandoy nga damlag makatapos sila sa ilang pagtuon aron pakaslan si Ella. Nakita man gud ni Ber ang kabuotan sa dalaga sa panahon nga magkasultihanay sila bahin sa ilang pagkatawo.

“Ang gusto ko sa usa ka babaye kanang dili laagan, kanunay  magpuyo sa balay,” pulong ni Ber. “Diha kanimo nakita ko nga mahimo kang buotan nga asawa.”

“Ang gusto ko usab nga lalaki, kanang dili bugoy, dili moinom og alak nga makahubog,” pulong ni Ella. “Kun naa kini kanimo, love kita forever, Ber.”

Dala komedya ang ilang pagsultihanay bahin sa umaabot nilang kaugmaon. Apan nagkasabot sila nga kinahanglan gayod nga matapos nila ang ilang pagtuon sa kolehiyo. Hinuon, para lagi kang Ber, nakahukom siya nga dad-on sa altar sa kaminyuon si Ella busa, bisan kun dunay higayon, dili niya gustong tandugon ang pagka babaye ni Ella.

Kanunay silang magkuyog sa eskuwelahan butang nga daghan ang nagtuo nga uyab gayod sila. Apan, wala palandunga nga nahitabo ang dili unta angay mahitabo sa sama kanilang managhigugmaay. Sakay si Ber sa iyang kotse dihang sa kalit, mitabok ang usa ka mananap hinungdan nga nasungag si Ber. Patay si Ber dihang gidala siya sa tambalanan. Patay usab ang mananap.

Naguol si Ella sa nahitabo sa iyang hinigugma apan wala siya’y mahimo kun mao kana ang nalatid sa kapalaran ni Ber. Makita si Ella nga kanunay maghilak tungod sa maong panghitabo.

“Ingon man gayod niana ang kapalaran sa matag tawo, El,” pulong sa usa ka higala. “Makakita ka gihapon og laing Ber sa imong kinabuhi.”

Nanglabay ang mga adlaw, nakatapos si Ella  sa iyang pagtuon sa kolehiyo. Dunay mga lalaki ang nagmanggad kaniya sa gugma apan pulos niya kini gibalibaran.

“El, wala na si Ber. Ania ako nga mohulip diha sa imong dughan,” pulong sa usa ka lalaki nga nangulitawo kang Ella. “Patay na ang kagahapon ni Ber ug angay kini nga hikalimtan.”

Apan lahi si Ella. Tinuod nga patay na ang kagahapon ni Ber apan dili basta lang kini isalindot hangtod nga kini dayon mahikalimtan. Apan, wala dayon niya kini balibari.

“Kun tinuod kang nahigugma kanako, paabota ang panahon nga mahikalimtan ko si Ber,” pulong ni Ella. “Sa pagkakaron, si Ber gihapon ang ania sa akong hunahuna.”

Hangtud asa kutob ang pagpaabot niadtong lalaki nga nahigugma kang Ella? Si Ella lang ang nasayod basta kun si Ella  lang ang pangutan-on, si Ber pa gihapon ang iyang gihigugma. Para kaniya, angay gayod handumon ang kagahapon. (Kataposan)