BIR kusog maningil, kuwarta hain na?

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Tapos makabangon si eight world title division champ, Manny “Pacman” Pacquiao gikan sa taudtaod nga pagkahagba pinaagi sa impresibong kadaugan nga iyang gitarok didto sa Cotai Arena, Venetian Hotel and Casino, Macau, China, gisugat siya’g usa ka makabungog nga kasong tax evasion sa taga Bureau of Internal Revenue (BIR). Gipangpugngan ang tanan niyang bank book kay hadlok ang BIR nga kawaton sa Pambansang Kamao ang kaugalingon niyang kuwarta, diin iyang kaugalingon kusog, kahago ug kinabuhi maoy gihimong puhonan.

Dili kuwarta gikan sa Pilipinas ang gipatud-ag singot ug dugo ni Manny. Mga premyong dolyares kini gikan sa Amerika. Makatarunganon nga kortihan og buhis sa mga puti ang maong ganti kay didto man kini pupoa ni Pacquiao sa ilang yuta. Pero, ang Pilipinas? Wala’y angay, uy! Kalain uroy ining gibuhat sa BIR? Unsa, wala sila’y salig ni Manny, kinsa maoy nagdala og dakong garbo ning sobra ka korap tang nasud? Nganong inyo mang pugngan ang salapi ni Manny nga nasayod man ang tibuok kalibotan nga iya ning mga kinayoran taman sa ginhawa? Na’ayyy, kanang binilyong kuwarta sa mga Senador ug Kongresista, ay! Monay, imbargoha, BIR, kay kuwestiyonable na! Gikan pa gyud na namo, mga pobreng mamumuong kuwartaha! Samot na nang nagtumpitumping bahandi nga gitagoan ni Napoles. Mao nay pangitaa ug sakmita!

Hangyo lang. Ayaw ipaibabaw kining isyu bahin ni Pacman aron maoy itabon sa on-going nga imbestigasyon sa P10B Pork Barrel Scam sa Senado. Sa mga higala ko sa media, kinahanglang di ta mohunong sa pagpaniid ug pagpangdukiduki unsa nay dagan sa kaso ni Napoles ug sa mga Senador, dili lang kay kutob lang sa pagsugod; kun dili, hangtod na gyud sa pagkahuman. Ato gyud ning sundan, Bay, aron dili mawala sa eksena.

P2B kapin ang gisingil sa BIR ngadtong Manny. Kang Manny lang ni, ha? Ang mga dagkong  negosyante dinhi sa ato nga mas dato pa kay ni Manny, pila sab kahay gipabuhis sa BIR, no? Natural, mas dako pa! Unya, daghan bayang datong negosyante sa Pilipinas, do! Ang mga artista pa, nga minilyon sab ang kitaon kada tuig? Kini walay paghisgot sa mga middle class nga magpapatigayon.

Pastilan, pagka-abunda diay sa salapi nga makolekta sa BIR matag tuig. Binilyon ka pesos! Tingali, motrilyon pa. Kana, kun tarungon lang sa pagdala.

BIR, sa inyong pagkakusog maningil ug manggukod sa mga tax evaders, segurado gayod nga mosamot kadaghang binilyon ka pesos ang mapundo diha sa panudlanan sa gobiyerno. Ang pangutana: “Hain na man ning kuwartaha? Aber, tagai kuno kaming katawhan og makiangayong husay.