Paraiso - Gula 34

“Benturada,” gisangpit ni Rey ang iyang sakop.

“Ngano, Sir?” Mihunong sa pagmakinilya si Benturada ug miatubang kaniya.

“Ikaw lang unay bahala dinhi,” ni Rey pa. “Duna lang koy lakton.”

“Yes, Sir,” mitando ang polis.

Sa dihang mogawas na unta si Rey sa ilang buhatan aron pag-adto sa Orchids Sisters Convent nga nahimutangan ni sister Veronica, mao gayo’y pagtingog sa intercom. Si Capt. Sancho Benale ang nadungog ni Rey nga nagsulti. Siya ang gitawag sa kapitan.

“This is SPO3 Corpuz, Sir!”

“Come to my office immediately.”

Wala tuyoa nga nakapanglingo si Rey human sa hamubo nga panagsulti nila ni Capt. Benale sa telepono. Nakasabot siya nga may mahinungdanon kining pakigsultihan kaniya. Ug dinalian. Malagmit nga aduna na usab sila’y operasyon.

Nakapanaguto si Rey samtang nagpaingon sa buhatan ni Capt. Benale. Gusto unta siyang makigkita kang sister Veronica karon. Apan tungod niining pagpatawag sa iyang labaw kaniya, malagmit nga dili mahinayon ang iyang gilaraw nga pagpakigkita sa maanyag nga madre.

Nanuktok paghinay si Rey paghimuntog niya sa tungod sa tinakpang  lawak diin mabasa sa pultahan ang dagkong mga titik nga: Capt. Sancho Benale, CPD. -- Sumpayan pa