Pinaskuhan unya

“Oy, Dong. Akong pinaskohan unya ha?” ni Nilo ngadto’s iyang higala nga si Ponso pag-agi niya sa karsada atbang sa merkado sa baryo Dughay.

Karon lang sayong buntag nakasugod og hike si Ponso gumikan sa iyang sakit nga dayabitis ug nikomplikar sa iyang baga. Naospital og napulo ka adlaw si Ponso tungod sa pneumonia.

Unom ka bulan siyang nagpuyo lang sa ilang balay. Gipiyal niya sa iyang kapikas ilang negosyo nga karenderya sa merkado. Dodong ang angga ni Ponso nga nailhan sa iyang mga higala. Kay iyang ginikanan, mga igsoon ug kaparyentehan, Dodong ang isampit nila. Bisa’g Alfonso ang tinood niyang ngalan.

Si Nilo metro aide sa ilang baryo. Kababata ni Ponso. Unya nisurok og gamay ang dugo ni Ponso sa pagkadungog sa higala. Nga ang gihunahuna pinaskohan lang. Wa gani mangumusta og naunsa na si Ponso.

“Pinaskohan ra gyu’y naas imong hunahuna? Wa gani ka mangutana’g naunsa ko. Nga dugay man tang wa nagkita!” ni Ponso nga pintok ang tunada.

“Hapit na man god ang Pasko,” ni Nilo nga nipahiyom og hilaw.

“Hapit na bitaw. Pero ang imong gihunahuna ang imo rang kaugalingon. Kun tinood kang higala nga nibati sa higala, dili kay pinaskohan lang imong hisgutan sa atong panagkita,” ni Ponso.

“Ngano man diay, Dong? Naunsa man diay ka?” ni Nilo niurong og panilhig sa karsada.

“Wa gyud diay kay kalibutan kun naunsa ko. Busa, kun kanang pinaskohan imo dayong hisgutan kun makakita ka’g amigo, kuli kaayo ka nga mahatagan,” ni Ponso dayong sirit og lakaw.

“Sayo mang gisaput si Dodong!” bagulbol ni Nilo nga nisunod og tan-aw sa likod sa higalang naglakaw. Nakapangawot sa ulo.

Ug nakaamgo siya nga di gyud maayo nga mohisgot dayon og pinaskohan sa higala. Dapat mangumusta gyud una. Labi na’g dugay nang wa nagkakita.

“Husto. Nakadungog man diay kong nasakit siya. Sipyata gyud nako wa ko nangumusta,” tuaw niya sa hilom. (Katapusan)