Tahas sa Disyembre

Sa unang adlaw sa Disyembre gipapauli na ni Atty. Owen Nadomo sa probinsiya iyang asawa ug anak. Iyang gipaipon sa iyang ginikanan sa sityo Kambagyohon, Alegria, Cebu. Maayo gani kay wa pa nagtungha ilang bugtong anak nga si Manman, 4 anyos. Kay sukad sa paglinog niadtong  Oktubre, wa na siya’y tambongtambong og hearing diin makakobra siya’g appearance fee sa mga kliyente.

Naglisod na gani siya’g abang sa iyang balay diin diha ra sab iyang bupete sa usa ka lawak. Kasagaran sa iyang mga kaso tua sa Palace of Justice sa Kapitolyo. Way bista mahimo tungod kay dili na paokupahan ang bilding sa husgado. Sa Mandaue ang duha ka branch sa RTC wa say klarong husgado. Maong nawad-an og bread and  butter si Owen. Nakahunahuna siya’g bag-ong raket.

Mingaw ang bulan sa Disyembre sa mga abogado. Kay wa nay moduaw nga kliyente kay mahadlok pangayoan og pinaskohan. Mao ni ang masakit nga kamatuoran.

“Day Riza, pauli lang una mo’s probinsiya. Kay dinhi’s siyudad, higutman man ta. Mangita lang ko’g laing raket. Moapas lang ko ninyo sa noche buena,” subo ang tunada sa pulong ni Owen ngadto’s iyang kapikas nga mao ray iyang sekretarya. Gigakos niya iyang kapikas. Gihagkan. Gihapohap ang ulo ni Manman. Gihatud niya sa terminal iyang pamilya sa second hand niyang sakyanan nga Toyota Corolla. Naglisod na gani siya’g panggasolina sa sakyanan.

Karon, Disyembre 13, sugdan na ni Owen iyang tahas. Nagsul-ob siya’g maong nga karsones. Sapatos guma. Ordinaryong T-shirt (ukay-ukay). Gikuha niya sa kuwarto ang giabugan na niyang gitara. Dugay na niyang wa nagamit. Gisul-ob  niya iyang baseball cap nga pula. Nag-shades siya. Gisambilay niya iyang knapsack nga sinudlan og extra nga mga T-shirts ug ubang gamit. Gisirhan niya iyang bupete ug balay giabangan. Nananghid na daan siya’s tag-iya nga mobakasyon siya’s probinsiya.

Gikan sa Mambaling diin nahimutang iyang balay giabangan, kapin kun kulang, ngadto sa Alegria, dunay 110 kilometros. Mag-hike lang siya padulong didto. Kun makapanaw siya’g napulo ka kilometro kada adlaw, mga onse ka adlaw, moabot na siya. Unya, manaygon siya samtang maglakaw. Siyaro’g way mohulog sa iyang panaygon. Nga maayo man siya’g tingog. Miyembro man siya’g band sa hayskul pa. Ug tigkantahan sab siya sa mga videokehan sa panahon sa kolehiyo sa wa pa siya naabogado. Pakantahon sab siya’g mga kasal sa iyang mga higala ug paryente.

Gilingi ni Owen ang siradong pultahan sa iyang bupete. Hilom nga nanamilit. Ug nipadayon siya sa paglakaw nga gikutingkuting ang gitara aron sa pag-angay. Mao ni iyang tahas sa Disyembre. Manaygon. (Kataposan)