Gugma sa Bol-anon - Gula 4

Nalipay kaayo si Agnes nga naangkon niya ang pagdayeg sa iyang mga editors tungod sa nindot nga mga detalyi sa iyang gisuwat nga balita. Dihang migawas na siya sa opisina sa iyang editor-in-chief nakahuna-huna siya nga pasalamatan niya si PO1 Martin Fuentes nga maoy nakatabang kaniya pinaagi sa paghatag og mga detalye sa drug bust.

“Walay problema Ma’am Agnes, kun duna gani ko’y mga nindot nga inpormasyon, pahibaw-on dayon tika aron mosamot nga modayeg kanimo ang imong mga labaw,” matud sa batan-ong polis. Milabay ang mga adlaw. Hapit na mahuman si Agnes sa pagsuwat sa iyang ikatulo nga balita dihang giduol siya sa operator sa ilang telepono nga nagpahibawo nga adunay nangita kaniya.

“Gipahuwat ra nako sa visitors area miss,” matud sa telephone operator. Gilantaw dayon ni Agnes ang visitors area ug wala gayud siya masayop, si PO1 Martin Fuentes ang nangita kaniya.

Gibiyaan ni Agnes ang wala pa mahuman niya nga gisuwat ug miadto siya sa visitors area. “Uy dia ka lagi Mar?” matud ni Agnes nga mora’g natingala pag-ayo.

“Dia ko kay aron maka-scoop ka na ‘sab. Wala man gud ko’y contact numbers nimo Ma’am Agnes mao nga napugos na lang gyud ko pag-anhi sa imong office. Duna mi raid karong kaadlawon kun gusto ka mouban,” ni PO1 Fuentes.

Bisan og wala motug-an ang higalang polis ni Agnes kun unsa ang subject sa ilang raid, apan nakasabot ang reporter nga daku gyud ni kay naghago man g’yud si Martin sa pagpahibalo kaniya.

“Unsa nga oras ang operation?” nangutana si Agnes kang Martin. “Basi sa briefing namo, mo-jump off ta mga ala-una sa kaadlawon aron nga tua na ta sa area mga alas kwatro,” matud ni PO1 Fuentes.

Nagduha-duha si Agnes kay sayo kaayo ug mahadlok siya nga moadto sa kampo nga mag-inusara sa lawom na nga gabii. “Kun gusto ka ma’am Agnes, kuhaon tika sa imong gipuy-an,” sa polis pa.

Nakapahiyom si Agnes sa pagkadungog sa tanyag ni Martin. Tuod nakauban gayud si Agnes sa operation sa mga sakop sa RID. Gironda diay niini ang usa ka buhatanan og mga armas sa Danao.

Si Agnes ra maoy nakakuha og aktwal nga mga hulagway gamit ang iyang moderno nga cellphone. Mas nindot pa gayud ang iyang mga detalyi nga nakuha kay sa iyang mga kaubang reporters.

Sa laing higayon gipahalipayan na usab si Agnes sa iyang mga editors. Kadto maoy nakapasuod pag-ayo nila ni Agnes ug Martin. Kanunay na sila nga magkuyog pagpanuroy. Hangtud nga nanguyab na gyud si Martin kang Agnes. - Sumpayan