Paraiso - Gula 27

Si Jonathan ang gihigugma ni sister Veronica. Apan lahi na ang iyang situwasyon karon. Wala na si Jonathan. Ug nahadlok si sister Veronica nga moabot ang higayon nga modatom ang kaluoy sa iyang kasingkasing alang kang Rey ug maanod siya sa pagsulay. Mao kini ang lintunganay sa iyang kabalaka.

Ang sama kang Rey dili lisod higugmaon. Suheto siya sa kinaiya niini sanglit iya kining kababata. Suod silang managhigala hangtod sa ilang pagkahingkod nga ulitawo ug dalaga ug si Rey nangulitawo kaniya. Wala lay suwerte si Rey kay si Jonathan maoy gipitik sa iyang kasingkasing niadtong higayona.

Karon nga wala na si Jonathan, gitakpan na ni sister Veronica ang pultahan sa iyang kasingkasing alang sa mga lalaki. Buot niyang itingob ang iyang panahon ngadto sa pag-alagad sa Ginoo. Malipayon siya sa iyang kinabuhi isip usa ka madre. Sulod sa kombento, nasinati niya ang kalipay nga wala niya masinati didto sa gawas. Kontento na siya sa iyang pagkabutang. Unsa pay nakulang kaniya nga duol man siya sa kiliran sa Diyos?

Gikan nga nagluhod, mitindog si sister Veronica ug unya milingkod sa ngilit sa iyang kama. Naghunahuna sa unsay maayo niyang buhaton. Apan namatikdan niya nga nablangko ang iyang kaisipan. Mikalit kini paghaw-ang. Wala gayo’y ideya nga misantop sa iyang hunahuna niadtong higayona.

Taudtaod gayod siya sa maong kahimtang. Nagpabilin siya sa kahilom nga wala masayod sa unsay angay buhaton. Hangtod nga kalit lang napalong ang lampshade nga diha sa ulohan sa iyang kama. -- Sumpayan pa