CCTV

Salamat gyud kaayo bay, ha. Gisulbad gyud nimo akong problema,” matud sa tawo ngadto ni Henry, sekyu sa Milky Way Publishing, tigpublikar sa Mega News. Mapahiyumon ang tawo karong sayong kahapunon nga nagkumkom og pinilong kuwarta aron ihatag ni Henry. Gilamano siya sa tawo dalang hatag sa pinilo nga kuwarta. Nag-ila og utang kabubut-on ang tawo ngadtong Henry sa gipakitang kaayo ni Henry ngadto sa tawo. Kuwarentahon ang edad sa tawo.

Apan wa lay kasayuran ang tawo sa tinuod nga motibo ni Henry.

“Ayaw bay. Di ko modawat. Wa ko mag-apas og bugti sa akong gipakitang kaayo ngadto nimo,” ni Henry nga wa nidawat sa kuwarta. P100 ang gigunitan sa tawo.

Nipasiklap si Henry sa CCTV camera sa usa ka eskina sa bilding nga nagdungaw sa pultahan padulong sa opisina sa publishing house.

Ang tawo ang nagmaneho sa puti nga Mitsubishi Adventure nga niparking ganiha atubangan gyud sa bilding sa publishing house. May nanaug hamtong babaye nga nagdala og folder. Piho nga magsusulat ug mokulekta sa iyang writer’s honorarium o talent fee.

“Muadto ko sa cashier,” matud sa babaye pagtungod sa pultahan diin nagbarog si Henry. Gipasulod niya.

Hapit kada tapus bulan makit-an niya ang maong babaye. Ug matud pa sa mga clerk, usa kuno ka maayong mosulat og sugilanon ang maong babaye.

Ang drayber nagpabilin lang sa sakyanan, samtang tua na sa sulod sa opisina ang babaye. Nagbasa og libro ang drayber sulod sa sakyanan. Unya takulahaw lang nanaug siya sa sakyanan. Gi-lock ang sakyanan. Unya nilantaw sa mga tindahan labang sa karsada atbang sa bilding. Nagbarog sa daplin sa karsada. Naghulat nga maputol ang trapik aron siya makalabang.

“Ry, primyohan tika’g P500 kun imo nang maengganyo tawhana nga makasulod sa opisina. Bisa’g kadiyot lang,” ni Archie, supervisor nga sekyu, mas dakog ranggo ni Henry.

“Ngano man?” ni Henry.

“Gustong mailhan ang pagkatawo anang tawhana sa atong chief security officer. Nagduda siya nga dunay police record nang tawhana,” ni Archie. “Mao ba? Akong tawgon,” ni Henry. Nigawas.

“Bay! Kadiyot lang!” ni Henry nga nisampit sa tawo.

“Ngano man unta?” sa tawo.

“Ikaw nagmaneho ining Mitsubishi?” ni Henry.

“O ako,” sa tawo.

“Hain man diay imong pasahero?” ni Henry.

“Tua pa sa sulod,” sa tawo.

“Kadtong magsusulat. Nga niadto sa cashier,” ni Henry.

“O mao to,” sa tawo.

“Asa man diay ka?” ni Henry.

“Mangihi lang ko sa karenderya sa atbang,” sa tawo.

“Sulod na lang sa opisina. May CR man diri,” ni Henry.

“Sige,” sa tawo. Nakapahiyom sa kahimuot.

“Di gyud ka modawat sa pahinungod nako sa imong kaayo? Kinasingkasing man ni akong paghatag,” sa tawo.

“Sa gikaingon ko na, way bugti akong gipakitang kaayo alang nimo. Sa sunod nimong balik, puwede ka moestambay sulod sa opisina. Samtang maghuwat sa imong pasahero,” ni Henry.

“Ok ra. Malingaw ra man kong magbasabasa sulod sa sakyanan,” sa tawo.

Paggawas sa babaye nga pasahero sa Mitsubishi, nisakay dayon sa sakyanan. Unya ang tawo nisaludo gyud makadaghan ni Henry dayong paatras sa sakyanang gimaneho. Nag-ilag dakong kabubut-on niya. Niisa sa walang kamot. Nakadayeg. Ug nipakita’g dakong respeto niya. Mapahiyumon lang sab si Henry nga niisa sab sa iyang kamot. Wa siya nidawat sa usa ka gatos ka pesos kay makita iyang pagdawat sa CCTV. Unya mas dako man siya’g madawat gikan sa iyang labaw. (Katapusan)