Gugma sa Bol-anon - Gula 2

Dihang nagkaduol na sila sa lungsod si Agnes ug PO1 Martin Fuentes, giingnan sa news reporter ang polis nga mohapit sila og restaurant kay aron sila makakaon.

“Pangita’g maayo nato nga makan-an Mar kay ako’y bangka sa atong paniudto para kabayad ko sa pag-escort nimo nako sa Barangay Cabangahan,” matud ni Agnes.

Tuod didto sila mipaingon sa usa ka kan-anan nga dili kaayo daghan ang kustomer. “Maayo dinhi Ma’am Agnes kay dili kaayo samok, maikog ko nga modala nimo sa mga kan-anan sa merkado,” matud ni PO1 Fuentes.

Nag-atbang sila og lingkud atubangan sa lamesa. Nakabantay si Agnes nga may mga higayon nga motutok ang batan-ong polis kaniya apan molingiw usab dayon kun magkaabot ang ilang tinan-awan.

“Basin kasuk-an ka na karon sa inyong hepe Mar nga wala ka na niya makita sa police station,” ni Agnes pa. “No, malipay pa gani tingali ang among hepe kay giatiman ka nako. Sayonan ka kun may mahitabo nimo dinhi sa among lungsod siya ang manubag,” pasabot ni PO1 Fuentes.

Gitug-anan ni PO1 Fuentes si Agnes nga usahay makabasa siya sa mga sinuwat nga balita sa reporter kun may makapalit og newspaper nga gikan sa Cebu.

“Mao ba? Inigbalik nako Mar sa Cebu, akong ingnon ang mga amigo nako sa PRO-7 nga ikaw ang buotang miabi-abi nako dinhi sa Bohol,” giingnan ni Agnes ang batan-ong polis.

Mipahiyom si PO1 Fuentes. “Bitaw, basin makatabang ka nako nga makabalhin sa Cebu. Gusto ko nga madistino sa intelligence kay dugay na nako kini nga pangandoy.”

Gipasaligan ni Agnes si PO1 Fuentes nga iyang hinabion ang kadagkoan sa Regional Intelligence Division (RID) kun mahimo ba siya nga kuhaon nila isip sakop ug anhi na madistino sa dakbayan.

Human sila makakaon, mibalik sila pagsakay sa motorsiklo sa polis ug mideritso sa police station. Didto na ang hepe nga si Inspector David Villanueva ug gi-interview dayon kini ni Agnes.

Gihatud ni PO1 Fuentes si Agnes sa terminal sa mga sakyanan paingon sa Tagbilaran. “Sigi Mar, dili ko malimot sa imong tinguha nga mabalhin sa Cebu. Ako na ang bahala pagsulti sa mga amigo nako sa PRO-7,” giingnan ni Agnes si PO1 Fuentes sa dayon na nga larga sa jeep paingon sa Tagbilaran.

Nalipay kaayo ang mga editors ni Agnes nga malampuson ang iyang paghimo’g follow up sa nahitabong pagpangahilo sa daghang mga bata didto sa Bohol. Starring usab kaayo si PO1 Fuentes sa iyang hulagway nga napublikar sa mantalaan pagkaugma. - Sumpayan