Di mahibaw-an kanus-a muabot ang kamatayon

Sadya ang panihapon nga gisaw-an sa magtiayong Nilda-Tony uban sa ilang mga anak. Si Nilda, nars sa USC South Campus samtang si Tony, usa ka doktor nga may kaugalingong klinika sa Toledo City. Lami ang ilang pagkaon kay puno man kini sa mga paborito nilang sud-an nga sinubakan sa ilang malipayong panag-bonding. Nabusog silang tanan.

Tapos sa ilang panihapon, misaka si Dr. Antonio “Tony” Noel sa itaas ug misulod sa ilang lawak-katulganan. Taudtaod, kalit lang kining miteks ni Nilda, diin ang mensahe mao: “Hatdi ko’g tubig diri kay maglisod man ko sa pagginhawa.”

Dihadiha, daling misulod ang asawa sa ilang kuwarto dala ang usa ka basong tubig. Apan nakurat si Nilda dihang maoy iyang naabtan nga maglisod na paglihok ang iyang bana. Unya kalit lang, nanug-ab si Tony og halawom kaayo. Ug wala na moginhawa.

Sama kapaspas sa kilat, gidali nila’g hatod si Tony sa Chong Hua Hospital. Gibombahan taman sa ginhawa sa mga maalamong kamot ang dughan sa pasyente, sa pamasin nga maulian ang wala nay umoy niining kasingkasing. Apan wala na gyod matabang.

Sabado, Nobiyembre 30. Gilubong si Tony sa Cempark human sa Funeral Rites nga ang officiating priest mao mismo ang iyang igsuong Bishop, kinsa milakbit-saysay sa ilang kagahapon, diin si Tony usa sab diay kanhi ka seminarista. Daghan ang nanambong sa maong misa didto sa Capitol Parish Church ning dakbayan.

Usa ka matahom handomanan nga gibilin ni Tony ngadto sa pinangga niyang Nilda mao ang iyang pagka buotan ug pagka sulondon nga bana. Sa kada suliran nga mohasmag sa ilang kinabuhi, gagmay man o dagko, wa gyod mahinumdom si Nilda nga nahasol siya. Ngano? Tungod kay si anhing Tony man maoy mosulbad sa tanan.

“Tony is a good husband. Pwerte pa namong komedyahay sa among pagpanihapon. Unya mao na diay kadto ang Last Supper nga makauban siya namo. Mao nga kamong mga asawa, mahala ug panggaa gyod na inyong bana, Day. Kay di gyod diay mahibaw-an kanus-a moabot ang kamatayon.” Panapos nga mensahe ni Nilda ngadto sa iyang mga suod nga higala, kinsa miduyog sa iyang pagbangotan. (Kataposan)