Gugma sa Bol-anon

Abtik nga pagka reporter si Agnes mao nga siya ang napilian sa iyang news editor nga ipadala sa Bohol nga daghan ang nangamatay tungod kay nahilo sa ilang mga gipangkaon. Gitahasan si Agnes nga mokuha’g dugang detalyi sa hitabo. Wala mobalibad si Agnes sanglit gusto usab siya nga makaadto og mga lagyo nga lugar.

Tuod dali ra nga nakaabot si Agnes sa iyang destinasyon. Sa wala pa mopaingon si Agnes sa barangay nga iyang adtoon, mihapit usa siya sa police station aron magpakisayud kun unsa na kalamboan sa ilan g imbistigasyon nga gihimo.

Didto nakaila ni Agnes si PO1 Martin Fuentes nga maoy unang miabi-abi kaniya pag-abut niya sa police station ug nagpaabot sa imbistigador. Taud-taud na nga nagpaabot si Agnes sa imbistigador apan wala pa gihapon moabut.

Nabalaka na si Agnes kay tingali’g malangan siya og dili na siya makatuman sa gitahas kaniya sa iyang editor nga himoan dayon og report ang gitahas kaniya. “Dugay pa g’yud moabut si SPO1 Duguilme?” gipangutana ni Agnes si PO1 Fuentes.

“Basin og mataud-tauran pa kadto Ma’am. Kun gusto ka mouna ka lang pag-adto sa dapit nga gipuy-an sa mga biktima. Ubanan tika sa Barangay Canhabagat,” mitanyag si PO1 Fuentes kang Agnes nga igo lang usa miyango-yango.

Taud-taud nakahukom si Agnes nga tumanon ang sugyot sa batan-ong polis. “Angkas lang ka sa akong motor Ma’am kay wala man masakyan paingon sa Cahabagat. Bukid-bukid man gud kini nga barangay Ma’am,” ni PO1 Fuentes pa.

Miabot og mga dul-an sa tunga sa oras ang ilang pagbiyahe. “Mao kini ang barangay Canhabagat ug kanang nagpundok nga kabalayan sa unahan mao kana ang pinuy-anan sa mga biktima nga nangahilo. Anaa anang kapilya ang lima ka bata nga nangamatay,” gitudlo sa polis ang dapit.

Misugod dayon si Agnes sa paghimo’g interview sa mga ginikanan sa mga bata nga nangahilo sa gikaon nila nga puto-balanghoy. Giadto usab ni Agnes ang nagbaligya sa mao nga makaon, usa ka tindera og makaon nga dunay tindahan kilid sa Canhabagat Elementary School.

“Gusto ka Ma’am adtoon nato ang kapitan sa barangay kay nadunggan nako ni SPO1 Duguilme kagahapon nga gitug-anan siya sa kapitan kUn ngano nga nangahilo ang mga bata,” ni PO1 Fuentes pa ngadto sa reporter.

Nagkasuod sila pagdali ni PO1 Fuentes ug Agnes. “Gigutom ko Mar, mangita ta’g tindahan nga maka-snack ta,” matud ni Agnes. Apan gikilo-kiloan siya sa polis. “Dili kita magpataka og kaon dinhi Ma’am kay basin og masunod ta’g kahilo,” sa polis pa.

Tuod, kalit nga misantup sa huna-huna ni Agnes nga tukma ang gitambag ni PO1 Fuentes. Giantos ra ni Agnes ang kagutom ug namalik sila sa lungsod. – Sumpayan