Sukdanan sa kalig-on sa gobiyerno

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Dili lamang ang pagsaka sa ekonomiya sa nasud ang basehan sa kalig-on niini. Dili igong himuong rason nga makaingon na kita nga adunay kapasidad ang kagamhanan sa pag-atubang sa moabot nga mga problema tungod sa paglambo sa ekonomiya sa nasud. Ang pagsuta og sukdanan sa kalig-on sa usa ka nasud makita lang kun giunsa niini pagtubag ug pag-atiman ang dagkong kalamidad ug problema nga nahiabot.

Si PNoy kanunay nanghambog nga misaka na ang atong ekonomiya. Apan makapanghambog ba siya nga abtik ug dali rang makatubag ang iyang gobiyerno sa mga trahedya ug katalagman nga atong nahiagoman? Unsaon man niya paghimakak sa reyalidad nga hinay ug bulay-og ang iyang kagamhanan sa pag-atiman dayon sa mga biktima sa kalamidad?

Napuno sa mga pagsaway ang atong gobiyerno karon tungod sa kahinay sa pagtubag sa panginahanglanon sa mga biktima nga gipanggutom ug giuhaw unya wala pa gayo’y kapuy-an nga naigo ug gisantako sa kusog nga bagyong Yolanda. Bisan ang reporter sa CNN nga si Anderson Cooper nga didto gayod sa  Tacloban ug nakasaksi sa makapakitbi sa atay nga mga talan-awon, nakaingon nga wala’y klarong sistema ang gobiyerno sa Pilipinas sa pagtubag ug pag-asikaso sa gikinahanglan sa mga biktima.

Bisan pa sa kadako sa mga hinabang nga naggikan sa gawas sa nasud, hinay pa gihapon ang pag-atiman sa gobiyerno sa kaigsuonan natong nangabiktima sa maong bagyo nga nagkinahanglan unta sa dinaliang pagtagad. Usa kini ka tamparos sa kagamhanan nga nagpasiatab nga miuswag na ang ekonomiya sa nasud nga Pilipinhon.

Ang nakaparat pa gayud kay ang national government mibasol niini sa local government sa naapektohang mga dapit. Unsaon man intawon pagtagad sa mga mayor ug mga opisyal sa maong lugar sa gihisgotang problema nga hangtod sila biktima man usab sa katalagman?

Ang nahitabo sa nasod nga mugna sa kapintas ni Yolanda maoy klarong sukdanan sa atong gobiyerno kun unsa kini kalig-on ug kun unsa usab kini ka huyang sa pagtubag sa mga dagkong katalagman nga moabot kanato. Unta magmata na ang kagamhanan nga dili madala’g hambog ug sulti ang pagsulbad sa bug-at nga problema nga moabot sa nasud. Kinahanglang ipakita sa buhat ug sa hustong sistema ang pag-atubang niini.