Mananaygon - Gula 6

Giganahan kaayo si Robert sa pamaagi ni Marilyn sa pagmasahe kaniya. Wala magtoo ang ulitawo nga makamao diay nga momasahe ang apo ni Nang Felomina.

“Nakat-on ko magmasahe kay gikan pa sa gamay pa ko ako pamasaheon man ko nila ni Lolo ug Lola,” pasabot ni Marilyn ngadto ni Robert samtang padayon siya nga mihapyud sa buko-buko ug sampot sa ulitawo.

Giingnan ni Robert si Marilyn nga wala gayud siya magmahay nga gidala niya sila si Nang Felomina aron papuy-on sa balay ug moundang na lang sa pagpanaygon.

Takulahaw lang miagulo si Robert sa kalalim nga iyang gibati dihang giayo’g hapyud ni Marilyn ang iyang buko-buko gikan sa iyang sampot. Gisunod ni Marilyn pagpislit ang mga paa ug bagtak ni Robert, apil na gani ang mga lapa-lapa.

“Hayang na Bert kay ang atubangan nga bahin sa paa maoy atong masahean,” giingnan ni Marilyn ang ulitawo. Dihang gisugdan na ni Marilyn sa pagpislit ang atubangang bahin sa paa ni Robert, wala kapugong sa pag-agik-ik si Robert nga gigilokan pag-ayo.

Gisud-ong niya si Marilyn nga nagmasahe kaniya. Takulahaw lang nga nahimugso sa iyang kasing-kasing ang kaibog sa kaanyag sa dalaga nga apo sa mananaygon.

“Lyn, wala ka pa man g’yuy boyfriend, pwede ba nga manguyab ko nimo,” matud ni Robert. Paglitok niya sa mao nga mga pulong, nakabantay si Robert nga anam-anam na ‘sab nga mituyhakaw si Junior samtang nagsud-ong siya kang Marilyn.

Wala makatingog nga mora’g nasud-ipan si Marilyn pagkadungog nga nanguyab na kaniya si Robert. Wala gayud magdahum si Marilyn nga buhaton kini ni Robert.

Taud-taud, nakabaton na og kaisog si Marilyn sa pagtubag ni Robert. “Ayaw gani’g binuang diha Bert. Mao tingali nga gidala mi nimo si Lola dinhi sa imong balay kay gusto ko nimo nga binuangan,” ni Marilyn pa nga mihunong pagmasahe.

Pwerteng abtika ni Robert nga nakapamalibad. “Dili ako ingon niana Lyn, tinuod nga sa una ko pa lang nga pagkakita nimo dihang milabang kamo sa karsada si Lola nimo, may talagsaon na nga pagbati nga miturok sa akong dughan.”

“Saba diha. Abi kay taga probinsya ra man ko imo lang g’yud nga bugal-bugalan,” mora’g may dala nga pagmahay ang tingog ni Marilyn. Apan gigunitan ni Bert ang bukton sa dalaga ug gipasabot pag-ayo nga wala siya magbinuang.

“Nag-inusara lang ko nga nagpuyo dinhi sa balay Lyn, ug swerte kaayo ka nga miabut sa akong kinabuhi. Ikaw ang himoon ko nga rayna niining akong panimalay nga napanunod ko sa akong mga ginikanan,” matud ni Robert.

Sa ikaduha nga higayon, wala makatingog si Marilyn. - Sumpayan