Gidabodabohan sa kalipay

Sa milabay’ng unom ka bulan; sukad sa ilang pagkasal, nausab ang batasan ni Linda. Kanunay niyang awayon si Ramon. Halos kada adlaw sila nga magkatinubagay. Mao kini ang nakapahinuktok ni Ramon karon sa iyang pag-inusara sa iyang opisina.

Gikan sa i yang opisina, mihapit si Ramon sa ilang Boboy; Extra-Ordinary Eucharistic Lay Minister sa ilang parokya ug iyang kabarkada sa Don Bosco dihang nag-hayskol pa sila.

“Komusta kana Mon? Unsay akong ikaalagad sa mahal kong amigo? Palihog lingkod.” Mahinangpon nga abi-abi ni Boboy samtang naghapnig sa mga magasin nga bag-o lang niyang nahuman pagbasa.

“Unsa may imong problema Mon?” pangutana ni Boboy.

“Dili ako ang problema Brod! Akong asawa ang problema. Wala ko’y nakitang hinungdan nganong maglagot siya nga motan-aw nako. Mag-sige og yawyaw. Dili ko kapugong nga dili tubagon. Unsa may angay kong buhaton Brod?”

“Sumala sa mga sinulat diha sa mga magasin ... mahitungod sa kinabuhing minyo ... nga akong nabasahan ug nasabtan; ang sulbad sa imong suliran dili na lisod buhaton. Ang imong himoon labihang sayuna. Inigsugod og yawyaw ni Linda; pagkuha og usa ka baso nga tubig. Inom og sakto nga maugom. Ayaw’g tonla. Limugmuga lang. Unya ra tonla kun si Linda mohilom na  ug mosulod sa inyong kuwarto,” tambag ni Boboy. Human sa duha ka semana, mibalik si Ramon sa ilang Boboy.

“Komusta ang problema ni Linda, Mon?” nangutana si Boboy.

“Epektibo kaayo ang imong tambag Brod. Nibalik na ang kanhing batasan ni Linda. Ako’ng gibuhat ang tanan mong pahimangno. Inigsugod og yawyaw ni Linda maglimugmug dayon ko. Salamat kaayo sa imong tabang. Sa dili pa ko molakaw Brod, mahimo ba nga imo akong sultihan sa sekreto ngano ang usa ka basong tubig nakapabalik sa maayong batasan ni Linda?

“Ang tinuod Mon, dili tubig ang nakapabalik sa maayong batasan ni Linda. Ang gamit sa tubig mao ra ang pagpatak-om sa imong baba. Kun si Linda walay madungog nga tubag sa iyang giyawyaw mohilom ra siya’g iya. Walay tinubagay nga mahimo. Dako ang akong pagtoo nga si Linda nangala. Mamunga na ang inyong panagtipon.

Si Ramon nga nakasabot sa pasumbingay ni Boboy; nakaamgo sa hinungdan sa mga yawyaw ni Linda. Gidabodabohan ang iyang dughan sa kalipay. Si Linda mabdos na. (Katapusan)