Mananaygon

Gipakusgan ni Robert pagpadagan ang iyang sakyanan aron nga dili siya maabtan sa stop signal sa eskena Colon ug Leon Kilat apan nakita niya nga may tiguwang nga buot molabang sa karsada.

Sigurado nga madam-agan g’yud ni Robert ang tiguwang nga nagsambilay’g gitara ug naggunit sa bukton sa iyang kuyog kun mulahos siya pagpadagan. Napugos si Robert pagpahinay ug naabtan g’yud siya sa stop signal.  Nakapanglingo-lingo si Robert ug naglagot apan takulahaw lang nga nahumpay ang iyang kalagot pagkakita niya ang batan-ong babaye nga kuyog sa tiguwang.

Bisan og wala’y pangarte ang batan-ong babaye apan hitsuraan kini. Gisundan ni Robert pagtan-aw ang tiguwang babaye ug ang iyang kuyog nga mipaingon sa pultahan sa usa ka kan-anan aron manaygon.

Nakita ni Robert nga giabog sa gwardya ang tiguwang ug ang iyang kuyog. Gibati si Robert og kalooy tungod sa iyang nakita. May kalit misantop sa iyang huna-huna.

Dihang “go signal” na, mideritso si Robert sa dalan Borromeo ug giparking ang iyang kotse atubangan sa usa ka estasyonan sa radyo. Nanaug si Robert ug mibalik sa dalan Colon.

Gusto niya nga makit-an pag-usab ang tiguwang kay hatagan niya’g gamay’ng pinaskohan. Nalooy kaayo si Robert pagkakita nga giabog sa gwardya ang tiguwang. 

Gipatuyhakaw ni Robert ang iyang liog aron dali ra niya nga malantawan ang tiguwang. Tuod, nakita niya nga nanaygon kini sa naninda sa aseras. Mitindog si Robert sa luyo sa duha ka mananaygon ug nakita niya nga gihatagan kini’g usa ka peso.

Dihang mibiya na unta ang tiguwang ug ang iyang kuyog nga babaye, gitimbaya dayon ni Robert ang duha. “Lola, daku na ba mo’g kita sa pagpanaygon?” iyang gipangutana ang tiguwang.

“Gamay pa kaayo dong, dili pa gani kapalit og panihapon namo ug sa akong apo,” matud sa tiguwang.

“Dali, ubani ko, mangaon ta kay wala ko’y kauban,” matud ni Robert dungan sa pagpasiklap sa kauban sa tiguwang. Diha pa niya masuta nga wala g’yud siya masayop. Gwapa g’yud ang maong babaye.

Mibalibad ang tiguwang ug nangatarungan nga mauwaw sila mouban kang Robert sa pagpangaon. “Hatagi na lang mi og gamay’ng pinaskohan sir, dili na lang mi mouban nimo’g kaon,” sa tiguwang pa. Apan giagbayan g’yud ni Robert ang tiguwang ug gipahiyoman ang batan-ong babaye. “Ayaw kaikog kanako Lola kay maayo ko’ng tawo,” matud ni Robert. Napugos g’yud ang duha ka mananaygon pag-uban ni Robert.

Apan miatras ang tiguwang ug ang iyang apo dihang si Robert misulod na sa kan-anan. “Ako sila nga mga kauban, mangaon mi,” giingnan ni Robert ang gwardya.  -- Sumpayan