Nainsulto pag-ayo

Dear Tita Salie,

Maayong adlaw. Usa ko sa mga nagsunod sa imong column. Ganahan lang gyod ko niining maong lindog sa inyong newspaper tungod kay nakatabang man kaayo. Unya ang mga problema nga ipadala usahay mao usab ang atong giatubang nga suliran. So at least duna nay mabasa nga tambag sa atong gihambin nga problema kun matsambahan nga pareho og problema.

Tagoa lang ko og Joris, 17 years old, of course dalaga pa ko ug bag-o lang nasakitan tungod sa gugma. Duna koy boyfriend sa una nga si Gary. Niabot og 1 month ang among relasyon. Apan wala’y swerte kay nagkabulag man mi.

Nainsulto gyod ko pag-ayo ni Gary, Tita Salie, tungod kay siya man hinuon ang nakigbulag kanako. Dili maayo paminawon nga ang lalaki ang nakigbulag sa babaye.

Human niadto nilarga ko sa laing dapit aron mawagtang ang akong kasuko. Apan sa akong pagbalik sa amoa, Tita, ug nagkita mi pag-usab gusto na pud niyang makigbalik kanako.

Wala pa nako dawata ang iyang gugma tungod kay duna ko’y pagduda kaniya kun unsa kaha ang iyang gusto. Unya wala pa usab mawagtang ang kasuko ko kaniya. Unsa may akong buhaton, makigbalik pa kaha ko niya? Palihug pasabta ko. Thank you very much and God bless you always.

* * *

Hello Joris,

Dili ka angay mainsulto tungod kay ingon gyod niini ang ubang mga lalaki, dunay practical, vocal ug prangka kaayong klase sa tawo. Dili pareho ang mga tawo bahin sa managsamang butang. Ug alang kanako mas ganahan ko og tawo nga prangka mosulti ug dili kamao mopasakay.

Seguro kun usa ako ka lalaki ingon usab ako sa lalaki nga wala nimo mauyoni, tungod kay moprangka gyud pagsulti kun wala tikaw mauyoni. Ug bulagan usab nako ang babaye nga dili maayo ang binuhatan ug dili angay himuong girlfriend.

Wala ko mag-ingon nga bati ka’g batasan o dili maayo ang imong binuhatan, Joris. Nasayod ko nga usa ka kabuotan nga babaye, hinungdan nga nasakitan ka ug nainsulto dihang gibulagan ka sa imong prangka nga uyab.

Sa dili ka pa masuko ug mainsulto, mas maayo seguro nga imo siyang pangutan-on kun unsay imong nabuhat nga wala niya mauyoni. Kun unsay batasan nimo nga supak sa iyang kabubut-on. Kay tingali kun gihimoan ka og estorya sa uban nga dili maayong paminawon niya mao nga iya kadtong nabuhat. Ang sayop lang sad sa imong uyab kay wala ka niya hatagi og higayon nga mo-explain. Kun duna ka pay gugma kaniya puyde nimo siyang dawaton pagbalik ug kalimti na ang iyang nabuhat diha nimo. -- Tita Salie