Isla Paraiso

Nailhan si Rey nga sharpshooter. Maayong laki sa natad sa pagpakigsangka batok sa mga kriminal. Mitublaw ang iyang ngalan sa kabantog.

Tungod sa gipakita niyang maanindot nga performance, kadali rang misaka ang iyang ranggo. Usa na siya ka senior police officer nga gidestino sa Thief and Robbery Section sa presinto 10.

Apan wala siya magdahom nga magkatagbo pag-usab ang mga dalan nila ni Veronica dinhi sa dakbayan sa Sugbo. Ug labaw nang wala siya magdahom nga usa na kini ka madre. Ambot, apan alang kaniya, sama sa usa ka aksidente  ang ilang panagkita pag-usab tapos ang hataas nga kutay sa katuigan.

 Dili na gyud malaksi sa panumdoman ni Rey ang panagway ni Veronica, aw sister Veronica diay. Sukad sa ilang panagkita kaganina niadtong wala damhang insidente sa bus, kanunay na siyang gihadla sa katahom niini. Matahom gihapon kini sama sa Veronica nga iyang gihalaran niadtong unang panahon.

Namatikdan ni Rey nga dihay talagsaong pagbati nga inanay mituyhakaw sa iyang kahiladman. Usa ka pagbati nga kusgan kaayong miulipon sa iyang kaugalingon. Ug gikulbaan siya naghunahuna niini. Ingon sa dili gayod niya kapugngan ang gahom sa maong pagbati.

Gitan-aw ni Rey ang iyang relo samtang nagpadayon ang pag-alindasay sa iyang kahiladman. Alas siyete na sa gabii. Husto nang ipanihapon. Apan wala siya gutoma. Ingon sa nabusog siya sa paghunahuna kang sister Veronica. -- Sumpayan pa