Isla Paraiso

Mipauli si Rey niadtong higayon nga nagbalon og kasubo. Naglakaw siya pauli sa ilang pinuy-anan nga wala sa maayong panghunahuna. Daw nawad-an siya sa paglaom sa kinabuhi.

Dugay siya naka-recover niadto. Gialam-alaman niya ang iyang kaugalingon nga ang pag-ayad ni Veronica sa iyang gugma dili pa mao ang kataposan sa kalibotan.

Pagligdas sa pipila ka adlaw, iya na lang nabalitaan nga mibiya na si Veronica sa dakbayan sa Tagbilaran. Wala siya masayod kun diin mopaingon ang dalaga. Apan nasayod siya nga wala na kini mobalik sa ilang lungsod. Iyang gisabot nga gibuhat kadto sa dalaga aron hingpit na niining mahikalimtan ang masakit nga kasinatian sa gugma nilang Jonathan.

Sa iyang bahin, nakahunahuna siya nga angay niyang bag-ohon ang routine sa iyang kinabuhi. Mangita siya’g paagi nga malingaw ang iyang kaugalingon ug dili na magkalingaw’g hunahuna kang Veronica.

Hangtod nga misantop sa iyang hunahuna nga mosulod pagkapolis. Nakahukom si Rey nga moalagad na lang sa kuwerpo sa kapolisan aron makatabang siya sa pagpanalipod sa mga igsuon niyang mga sibilyan.

Mihalin siya sa Cebu. Nag-abot siya sa pagsaka sa balay nila ni Teresita Galigao. Nagpasalamat siya nga dili dako ang kantidad nga gipangayo sa tag-iya sa balay sa iyang pagkasera.

Sa dakbayan sa Sugbo, natuman ang pangandoy ni Rey sa pagpolis. Usa siya sa labing gikaintapan nga polis sa dakbayan. -- Sumpayan pa