Uhaw sa pagmahal - Gula 6

 Nakasakay dayon sila og taksi si Rudy ug Elma. Nagtupad sila’ng duha sa luyo nga lingkoranan. Gikan sa Fuente Osmeña gipadiritso ni Rudy ang taksi sa usa ka dapit sa V. Rama nga sagad lubloban sa mga maghigugmaay.

Wala na batia og kauwaw si Rudy ngadto ni Elma ug samtang sila nagtupad paglingkud sa luyo nga lingkoranan, gitungtong ni Rudy ang tuo niya nga kamot sa paa ni Elma.

Tumong g’yud nga nagbestida ra si Elma, wala magkarsones. Gihuhapohap ni Rudy ang paa ni Elma. Gituyo ni Rudy nga hapohapon niya ang paa ni Elma aron nga anam-anam kini nga makabatyag og kalalim.

“Ayaw gud usa,” hagawhaw ni Elma ngadto kang Rudy. Mauwaw si Elma ngadto sa drayber sa taksi nga makaingon unya nga dili na lang g’yud sila makahuwat nga mahiabot sa motel.

Tuod, dali ra nga miabot ang taksi sa motel. Nakita ni Elma ug Rudy nga misulod na ang taksi sa ganghaan ug diritso na nga misulod sa bakante nga grahe.

Human mabayri ni Rudy ang taksi driver, nanganaug dayon sila ug misulod sa kwarto. “Tagbawa g’yud ang imong kaugalingon karon Rud kay mahimo ra og unya ko mopauli sa gabii,” ni Elma pa.

Nalipay kaayo si Rudy pagkasayud nga mahimo sila nga magkauban si Elma hangtud sa gabii.”Unsa’y pananghid nimo ni Lauro?” gipangutana ni Rudy si Elma samtang gisugdan na niya’g gakus.

“Ako’ng giingnan nga bisitahan nako ang akong amiga nga nagpuyo sa lungsod sa San Fernando. Aron dili matahap ako’ng giingnan nga paubanon siya apan mibalibad kay hasol na kuno,” matud ni Elma.

Kay taas pa man ang panahon sa ilang panag-uban, wala magdali-dali si Rudy. Nagtupad usa sila si Elma sa pagpanghigda ug nagsultihanay. Apan walay hunong ang mga kamot ni Rudy sa paghimo sa iyang gimbuhaton.

Anam-anam si Elma nga nakabatyag og kahinam. Si Elma na gani ang miparayeg pag-una kang Rudy. Dali ra ‘sab kaayo nga nadutlan si Rudy og kalalim tungod sa mga parayeg kaniya ni Elma.

Dungan na silang duha nga mihukas sa mga salimbong sa ilang kalawasan. Miginhawa’g lawom si Rudy dihang nakita ang hubo nga lawas ni Elma. Karon pa g’yud makita ni Rudy ang kinatibuk-an sa lawas sa babaye nga iyang naibgan.

Dihang giangkon ni Rudy si Elma pag-adto niini sa iyang balay wala kaayo niya maaninaw ang kanindot sa lawas niini kay gabii man sa maong higayon.

Nagkainit pag-ayo ang pamati nila sa usa’g-usa tungod sa nagpadayon nila nga pagparayganay. Hangtud nga giangkon na gayud ni Rudy si Elma. - Sumpayan