Gaba sa pamakak

Is this testimony you just stated before this court in the witness chair, in accordance with the will of God  the Supreme Judge?” ni Atty. Noel Olmos ngadto ni Mrs. Sherly Markas nga naglingkod sa lingkuranan sa testigo sulod sa husgado. Gi-cross examine niya ang testigo. “Yes!” ni Sherly nga maisogon. Nitutok pag-ayo sa abogado. Tinudloan man siya’s iyang abogado nga si Atty. Charlie Dagon. “Is this the thruth?” sa abogado. “Yes!”, sa testigo. “Is this in accordance with the path of righteousness?” sa abogado. “Yes!” sa testigo. Naminghoy ang abogado.

Nagpalsipikar si Sherly og dokumento nga maoy nakapabalhin ngadto sa iyang ngalan sa deklarasyon sa yuta sa iyang silingan nga si Mrs. Rita Pintol, kliyente ni Noel. Bisa’g tataw nga nagsibag ang petsa sa dokumento ug sa deklarasyon gibarogan ni Sherly iyang pamakak.

Naabsuwelto gyud siya sa kasong criminal sa pagpalsipikar og dokumento. Wala makanselar ang deklarasyon sa iyang ngalan. Pabor man niya ang clerk of court sa husgado.

“Di kaha ka gabaan anang imong pamakak?” sukot ni Andy iyang bana nga retirado nga kapitan sa barko. Nipahiyom lang si Sherly. Wa nitingog. Apan tataw sa iyang nawong iyang buot isulti, “motuoo diay ka’g gaba?”

Wa dangti’g tuig nabangkaruta ilang negosyo nga karenderiya. Imbes dako na unta sila’g kita sa trayenta ka potahe mata’g adlaw, wa nila damha nga nihunong ang mga customer og duol sa ilang kan-anan. Napugos si Andy og panarbaho og balik. Kay duna pa sila’y mga anak nga nagtungha sa kolehiyo.

Wa say tuig sa panarbaho ni Andy, nakadawat og text message si Sherly gikan sa opisyal sa barko nga higala ni Andy. “I’m sorry to tell you, that our ship sank after collision with a big tanker. Andy is missing.”

Hapit mabuak ang dughan ni Sherly sa kaguol. “Diyos ko. Pasayloa ko!” igo na lang siya sa pagtuaw. (Kataposan)