Uhaw sa pagmahal

Gula 5

Pagkabuntag, nagkatagbo sila si Rudy ug Elma sa tindahan samtang pareho sila nga adunay gipalit. Ingon sa aduna nay kausaban ang ilang tinagdan. Igo na lang sila nga nagpahiyomay nga masabot kaayo nga usa’g-usa mahadlok nga mahibaw-an ang ilang relasyon.

Kutob na lang sa pahiyom ug pasiklap ang gihimo ni Elma ngadto kang Rudy. Nagpalit diay si Elma og mga canned goods ug ubang kinahanglanon sa panimalay. Sa hilom nalipay si Rudy kay sigurado siya nga ang gihatag niya nga kwarta ni Elma maoy gigamit niini sa pagpamalit.

Dihang nakalakaw na si Elma nakabantay si Rudy nga gisundan kini paglantaw ni Manang Damasa nga tag-iya sa tindahan. “Milagro uroy kaayo si Elma nga gihutdan pagbayad ang iyang utang nga dul-an sa dos mil,” sa tiguwang tindera pa nga daw dili makatoo nga nabayran ni Elma ang tanan niini nga utang.

Wala motubay si Rudy sa tiguwang. Apan sa hilom misamot ang iyang kalipay kay ang gihatag niya nga kwarta kang Elma nakatabang g’yud diay nga dili maproblema ang babaye nga iyang naibgan sukad pa kaniadto.

Samtang padulong na si Rudy sa trabaho, sulagma nga nagkaabot na usab sila si Elma sa dapit nga atanganan og jeep. “Asa ka paingon Elm, manakay na lang ta og taksi aron ihapit lang tika sa imong adtoan,” ni Rudy pa.

Mibalibad si Elma ug mipasabot nga dili maayo nga adunay makakita nga sila nagkuyog. Nakasabot ra usab si Rudy. “Karong Sabado pwede ta magkuyog? Magkita lang ta sa Fuente Osmeña mga pasado alas dose,” ni Rudy pa. Mitangdo si Elma.

Naghinam-hinam na usab si Rudy tungod kay gusto niya nga magkauban sila pag-usab si Elma sa taud-taud na nga panahon. Wala gayud siya masayop nga dili na makabalibad kaniya si Elma kun mohangyo nga sila magdeyt.

Tuod, miabot ang Sabado. Nag-withdraw usa si Rudy og kwarta sa banko sa wala pa siya moadto sa Fuente Osmeña. Nagtoo siya nga wala na usa’y kwarta si Elma mao nga iya na usab kini nga hatagan.

Didto gabarog si Rudy duol sa ganghaan sa hotel kay malantaw man ang mga tawo nga mosulod sa Fuente rotunda. Taud-taud, nalantawan na ni Rudy si Elma nga milabang sa karsada ug mipaingon sa gate sa Fuente Osmeña.

Mitabok usab sa karsada si Rudy ug giduol si Elma nga iyang nakita nga milingkod sa lingkoranan ilawom sa kahoy’ng Acasia. “Hi Elm!” timbaya ni Rudy kang Elma. Nagpahiyomay silang duha.

“Tana, manakay ta’g taksi kay basin og adunay makakita kanato dinhi,” ni Rudy pa nga migunit sa kamot ni Elma. – Sumpayan