Isla Paraiso

Gula 14

Human sila si sister Veronica ug Rey magpanamilitay, misulod na si sister Veronica sa gate sa kombento sa mga madre. Human sirad-i sa guard ang pultahan sa puthaw nga sera, si Rey mitalikod ug naghulat og taksi nga kasakyan.

Gipara ni Rey ang taksi nga nagsingabot sa iyang nahimutangan. Mihunong kini. Midali siya pagsakay ug gimandoan ang drayber nga magpahatod sa Mambaling. Mitando ang drayber ug misugod sa pagpadagan sa sakyanan.

Mihunong ang taksi nga gisakyan ni Rey tungod sa balay nga may numero 123 nga nahimutang sa Natalio Bacalso Avenue. Mao kini ang balay nga gikaserahan ni Rey. Miabang siya’g usa ka lawak. Gusto siya nga siya rang usa sa kuwarto aron aduna siya’y privacy.

Human kabayri ang taksi nga iyang gisakyan, si Rey misulod sa balay. Midiretso siya sa room nga iyang giabangan.

Gihagsa ni Rey ang iyang kaugalingon sa ibabaw sa mahunolhunol nga kama. Gikapoy siya sa biyahe, ilabi na nga sukad pa kagabii nga wala siya’y kinatulgan. Nag-vigil sila sa haya sa usa nila ka kaubang polis nga nakalas sa usa ka panag-engkuwentro.

Unya kaganina sa iyang pagsakay sa bus pauli sa dakbayan sa Sugbo, natugaw ang iyang paghitagpilaw samtang naglingkod sa kinaulahing lingkoranan sa sakyanan sa dihang nagkaguliyang ang mga pasahero kay gitulis ang bus.

Napun-an pa ang gibati niyang kakapoy sa lawas sa nahitabong panag-engkuwentro tali kaniya ug sa mga hold-aper. Napatay gyud niya ang tulo ka hold-aper. Naglagot siya pag-ayo niadtong usa ka hold-aper nga buot molugos ni sister Veronica.

Takulahaw lang, mikusog ang butokbutok sa dughan ni Rey sa dihang milakdap sa iyang hunahuna si sister Veronica. -- Sumpayan pa