Isla Paraiso - Gula 13

Human kabayri ni Rey ang drayber sa taksi mibiya dayon kini sa ilang nahimutangan.

“Mao diay kini ang inyong kombento?” Gipaliraw ni Rey ang iyang mga mata. “Duol ra man diay kini sa among presinto. Mahimong duawon ko ikaw dinhi sa matag karon ug unya.”

“Hain ka man diay ma-assign?” ni sister Veronica.

“Sa presinto 10,” tubag ni Rey. “Sa thief and robbery section.” Miyangoyango si Veronica. Ug niya pa. “Sulod una.”

“Ayaw na,” balibad ni Rey. “Sa sunod na lang tingali...kun mahimo pang mobalik.”

“Ngano gong dili,” sa madre pa.

Alang kaniya, walay daotang kahulogan ang pagsanong niya nga mobisita si Rey kaniya sa kombento. Gitugot kini sa ilang superyor. Apan wala siya masayod nga gilain diay kini pagsabot ni Rey.

Gitulpok ni sister Veronica ang buzzer sa gate ug wala madugay naabli ang pultahan nga puthaw. Nakita ni Rey nga may guard diay sa sulod.

Sa dayon nang sulod ni sister Veronica, gilamano niya ang kamot ni Rey.

“Daghan kaayong salamat sa imong pagluwas kanako kaganina, ha,” nagkanayon ang madre.

“Okey lang,” ni Rey. “Katungdanan ko ang pagpanalipod sa katawhan batok sa mga daotan. Busa wala ikaw’ng angay pasalamatan.”

“Maskin na,” sa Madre pa. “Utang kabubut-on ko gihapon kanimo ang akong kaluwasan kun wala ka pa, hayan nahulog gayod ako sa kamot niadtong manyakis nga hold-aper. Sama ikaw sa usa ka manulonda nga gigamit sa Diyos sa pagluwas kanako.”

Nahilom si Rey. -- Sumpayan pa