Kastigong wa’s lugar

Grabe makakastigo si Myrna sa iyang anak nga si Maricor, siyete anyos. Tungod kay gibiyaan siya’s iyang bana nga si Brando, nikuyog og laing babaye, gamay’ng sipyat sa bugtong anak nila pahimungtan ni Myrna ang bata.

Karong buntaga, Sabado, nagpasad lang ang mga duwaan sa bata, giligid dayon og bunal ni Myrna. Tungod sa kagrabe mamunal ni Myrna ang bata makasinggit na lang og “Ayaw ko’g patya! Ayaw ko’g patya! Ayaw intawon!”

Sa kalisang sa bata mitago sa kuwarto. Nanira. Unya, kun makakita og tawo (bisa’g kinsa nga kauban sa balay), mosinggit og “Ayaw ko’g patya!” unya modagan  motago ilawom sa katre. Mora na’g nabuang sa kalisang ang bata.

Naluoy unta sa bata sila si Dencio ug Marta ang mga apohan ni Maricor. Apan wa sila’y mahimo. Kay singkahan lang sila ni Myrna. Kinamaguwangang anak  si Myrna. Sunod si Nancy dalaga pa. Dayon si Roger ikatulo ug kinamanghurang anak.

Ulitawo pa si Roger. Ipon gihapon si Myrna sa iyang mga ginikanan. Samot na ron nga gibiyaan na siya’s iyang bana. Dunay paktori sa mga leather products si Dencio, sama sa bag, pitaka, sinilas ug kawo. Silang tibook pamilya ang nagdumala sa negosyo ug daghan sila’g mga empleyado. Mao ra ning negosyoha ilang gipangabuhian.

Giduol ni Roger si Maricor aron am-aman. Apan nalisang kini. Nitago sa suok. Ug nagpaninggit nga “ayaw ko’g patya!” Nahadlok si Roger  og madayonan og kadaut sa utok ang bata. Nangita siya’g  paagi.

Gitawag niya iyang higalang doctor. Kay maulaw siya mosulti sa tinood iya lang gisultihan ang doctor nga nalooy siya sa bata anak sa ilang silingan. Gikastigo pag-ayo sa inahan. Unya mora’g nabuang sa kalisang. Di na moduol og tawo. Unya kun may mohana og duol, modagan dayon mosinggit nga “ayaw ko’g patya!”.

Pinaagi sa telepono nihatag ang doctor og ngalan sa tambal nga maoy paliton aron ipatumar sa bata. Gipalit ni Roger ang tambal. Apan naglisod gani sila’g patumar niini kay dili paduol ang bata. Ang mga apohan maoy gipaduol kay mapinanggaon kaayo sa bata. Ug wa gyud kadapat niini. Nisali’g ang bata sa mga apohan nga nagkurog. Nakatumar gyud og tambal ang bata. Pagkataudtaod nikalma na kini.

Nakahukom si Roger nga mahitabo pa gani og usab ikiha niya iyang maguwang og kasong Child Abuse. Dili na siya paduolon sa bata ug adto na si Maricor sa kustodiya sa iyang mga apohan. (Kataposan)