Uhaw sa pagmahal

Gibuksan dayon ni Rudy ang pultahan. Wala gayud siya masayop kay si Elma ang nanuktok. “Pasudla dayon ko Rudy kay basin og adunay makakita nako,” matud ni Elma nga nagpanglingi.

Nakapahiyom si Rudy kay wala gayud siya magtuo nga tinud-on ni Elma ang pag-adto sa iyang balay karong gabhiona. “Dili ba miingon ka man kaganinang buntag nga arion tika karong gabii?” gipahinumdoman ni Elma si Rudy.

“Wala ko makalimot. Apan wala ko magtoo nga tinud-on nimo kadto kay sagol komedya ko ra man kadto Elm,” ni Rudy pa nga mipalingkod ni Elma sa hunol-hunol nga lingkoranan.

“Mao ba? Hala uy, mopauli na lang diay ko,” paraygon kaayo ang tingog ni Elma ngadto kang Rudy. “Ayaw uy, puslan man nga dia ka na dinhi, pahimudsan na lang nato ang higayon,” matud ni Rudy nga miagbay dayon ni Elma.

Gitug-anan si Rudy ni Elma nga ang pananghid niya sa iyang baldado nga bana mao nga mobilar sa namatay nila nga silingan sa unahan. “Wala tawon masayud ang akong bana nga dia ra diay ko nimo,” ni Elma pa. “Dugay ra kaayo ko nga nagpaabot niining maong higayon Elm nga magkauban kita nga kita ra’ng duha,” ni Rudy pa nga misugod dayon sa pagparayeg kang Elma.

“Rudy, makasala na g’yud ko sa akong bana,” ni Elma pa, apan gipasagdan ra niya si Rudy nga mipakaligo kaniya’g mga hawok. “Mamalhin ta sa ako’ng kwarto, tana,” giingnan ni Rudy si Elma dungan sa pag-agbay kaniya.

Samtang katulgon na unta kaganina si Rudy apan karon daw nanginit ang iyang kalawasan sa kahinam dihang nakaparayeg siya kang Elma. Mainampingon nga gipahigda ni Rudy si Elma sa iyang higdaanan.

Dihang nakapahimutang na si Elma, subli niya kini nga giparaygan. Wala gayud magdahum si Rudy nga moabot kining mao nga higayon. Dihang gikasal si Elma kang Lauro, wala gani siya motambong sa kasal niini kay gisakitan siya pag-ayo.

Usa si Rudy nga nangulitawo kang Elma kaniadto apan si Lauro maoy nahimong palaran kanila. Anam-anam na nga gitangtang ni Rudy ang mga salimbong ni Elma samtang walay hunong ang iyang pagparayeg.

Ning higayuna, gidutlan na sa hinay-hinay si Elma kay nakig-alayon na kini sa pagparayeg kang Rudy. Misamot ang kainit sa kalawasan ni Rudy tungod sa pakig-alayon na ni Elma sa pakigparayganay.

Hangtud nga giangkon na gayud sa hingpit ni Rudy si Elma. “Daw usa ka lang gihapon ka dalaga Elm, mora’g wala makatatsa kanimo si Lauro,” hagawhaw ni Rudy kang Elma samtang padayon siya sa pagpabatyag og kalalim. – Sumpayan