Ang babaye sa mall

Naunsa ka bay Atoy? Mura man ka’g nakadaug og grand lotto 6/55 dako man kaayo ka’g ngisi abot sa dunggan?” matud ni Otoy nga naglingkod-lingkod sa ilang pantawan. Bag-ong nahuma’g panihapon.

Mga alas-otso sa kagabhion nag-jacket kay medyo tugnaw ang panahon. Ingon ini man gyud kuno ning buwan sa February tugnaw pa kay sa Disyembre. Kay mao man kuno roy pagpangatunaw sa mga snow kon “spring.”

“Suroy ko ganina’g mall, Bay ba. Nay naglingkod babaye. Guwapa kaayo sexy hamis og kutis naglingkod sa lingkoranan. Tungod sa akong kaibog akong gitapdan,” matud ni Atoy nga mipaduol kang Otoy.

“Unya?” matud ni Otoy nga nainteresado sa estorya ni Atoy.

“Kay wa man ko kaagwanta Bay. Mihinay ko sa pag-agbay. Gituyo ko la’g panghuy-ab-panghuy-ab Bay. Nanuy-od ko sa akong kamot dayong sablay sa iyang abaga,” ni Atoy nga nanugilon with action.

“Unya paunsa mang babaye bay? Nakalitan to?” matud ni Otoy nga seryoso kaayong mitutok sa nawong ni Atoy.

“Wala ra may gimok Bay,” matud ni Atoy nga pinalingo-lingo ug pinapaak-paak pa sa iyang ngabil.

“Binuang ka diha Bay,” matud ni Otoy nga mikuot ilawom sa iyang purol.

“Unya akong kamot nga nag-agbay kay duol na man lang sa iyang dughan Bay. Ako na lang pong gipa-slide og lahos Bay dayong himas sa hinay-hinay,” ni Atoy nga pinahinay ang tingog kay makadungog nya ang mga ginikanan ug igsuon ni Otoy sa sud.

“Yamat ra pud ka. Wa ka kuyawi Bay?” ni Otoy nga mibaik-ik og diyotay.

“Kuyawan pero naglabaw mang kahinam,” ni Atoy nga mibaik-ik pud.

“Unya paunsa mang babaye Bay?” Hisagpaan ka na?” matud ni Otoy nga nagpugong-pugong sa gikusgon sa iyang tingog.

“Wa ra man gihapon Bay. Unya kay naninambid man siya Bay. Mubo kaayo’g sayal Bay. Akong gikuot ilawom sa paa Bay,” ni Atoy nga pinapiyong-piyong pang mata.

“Miigking na gyung babaye adtong higayona Bay?” ni Otoy nga migahi nang dapit sa siper sa iyang purol. Nagbutok-butok iyang dughan ug alimpatakan sa kahinam.

“Wa gihapon Bay. Kay di na man gyud ko makaagwanta sa tanan Bay. Dihang wa nay tawo sa akong paglingi-lingi Bay. Ako na gyung gigakos ug gihagkan sa ngabil ang babaye Bay. Nagpatara ra man pud,” ni Atoy.

“Hambogero ra pud ka. Wa gyud mopalag ang babaye?” ni Otoy nga nangyam-id kay nasuya.

“Unsaon pagpalag Bay, nga manikin man diay to gud!” (Kataposan)