Ang pahiyum ni Sr. Santo Niño

 Si Lola Petra, nagpanuigon na og 72 anyos. Wa siya’y paryente nga kauban niya sa dako niyang balay. Busa, nanawat na siya’g mga lodgers nga gipapuyo niya sa pipila ka mga kwarto sa maong pinuy-anan.

Hinuon, matag karon ug unya, si Leandro nga anak sa iyang sinagop nga si Lydio. Moanha niya. Usahay, mangayo’g idugang sa iyang kuwarta kay mosuroy siya sa SM. Pero human niya’g hatag, ug makalakaw na si Leandro nga nahibaw-an niyang tiggamitan sa ginadili nga drugas, moatubang dayon siya sa altar ug makigsulti sa karaan niyang imahen ni Sr. Santo Niño.

Kun magpabilin kunong magpahiyum ang imahen, nagpasabot nga way dautang mahitabo, o ngil-ad nga mahimo si Leandro. Labi na kay sa luyo sa iyang balay giila na kining SSS kon suyopanan, sugalan ug sulinganan.

Kay ang namuyo sa maong gamay’ng balay, gawas nga magsugal, magsuyop pud kuno sa ginadiling drugas, ug manuling sa mga babayeng lodgers ni Lola Petra.

Usa ka higayon niana, miabot si Leandro nga nagdala og bag.

“La… anhi una ko puyo. Kapoy kaayo sila’s papa ug mama. Sige la’g away,” matod pa ni Leandro.

“Aw, na hala. Pangayoa ni Bastian ang yawe sa guest room. Naa ra man ang kwarto ni Bastian tupad sa guest room. Unya, human makailis, nananghid si Leandro nga mogawas una.

Pagtalikod ni Leandro, sama sa naandan, miatubang si Petra sa imahen ni Sr. Santo Niño. Natingala si Petra kay nagtalikod man ang imahen. Gipangutana niya si Bastian kun gihilabtan ba niya ang imahen, apan miingon si Bastian nga wa sya manghilabot.

Taudtaod, may boto-boto nga nadungog. Unya, naghangos si Bastian nga nagkanayon.

“Mana Petra…Mana Petra..! Gi-raid ang luyo. Naapil og dakop si Leandro…” (Kataposan)