Isla Paraiso Gula 9

Apan sa didto na ang hold-aper sa duol sa gitagoan sa lalaki, ang iyang kaaway kalit kaayong migawas gikan sa ilawom sa lingkoranan sa bus. Naghayang kini sa salog sa bus samtang nagkablit sa gatilyo sa iyang armas. Ang hold-aper nga wala magdahom sa gipakitang kaabtik sa lalaki sa pagpakig-away wala makalikay sa mga bala nga gibuga sa iyang hinagiban.

Nalup-og kini sa salog sa bus duol sa nahilun-an sa lalaki nga nagkalo og brown ug nagdiyaket og maong. Nabuhian niini ang armas nga gigunitan. May dugo nga nanggawas gikan sa baba ug ilong sa maong hold-aper.

Abtik nga mibangon ang lalaki nga mipusil sa tulo ka hold-aper. Gisindol niya ang armas sa mga hold-aper aron mahilayo kini sa ilang patay’ng mga lawas. Unya gipaliraw niya ang iyang mga mata sa sulod sa bus.

“Luwas na kamo sa kakuyaw,” giingnan niya ang mga pasahero.

Ang mga pasahero nga nangluklok sa ilawom sa lingkoranan ingon sa naibtan og tunok sa kugang-kugang pagkabati sa iyang gisulti. Nag-iyahay sila’g panggawas gikan sa ilang gitagoan. May pipila ka mga babaye nga nakasangpit sa pagpasalamat sa Diyos nga walay dautang nahitabo kanila.

Ang lalaki nga nakapatay sa tulo ka hold-aper midali pagpaingon sa nahimutangan ni sister Veronica didto sa lingkoranan luyo sa drayber. Ang madre ingon sa nahuwasan sa dakong hilanat nga wala siya mahulog sa mga kamot niadtong hold-aper nga buot mopahimulos sa iyang pagkababaye. -- Sumpayan pa