Maestro nga sulundon

(A True Story)

Nakadayeg gayod ang mga ginikanan ni Noregim nga sila si Dina ug Kardo. Tungod kay bisan lisod kaayo ang ilang kahimtang naningkamot man kini sa pag-eskwela.

“Mama Dina ayaw kamo kabalaka sa paggasto nako kay inig gabii mo drive ako og trisikad,” pulong ni Noregim.

“Noregim, ihangad lang ni nato ang atong kahimtang sa Labaw’ng Makagagahom”, matud ni Dina.

“Ayaw kamo kabalaka Noregim, kay sa akong pagpanagat makatabang ako sa paggasto labi na nga mahigugmaon kaayo ka sa pag-eskwela”, sagbat usab ni Kardo.

Pila may dagan sa mga katuigan natapos na ni Noregim ang elementarya. Unya sa pag-eskwela niya sa hayskol nag “working student” intawon siya aron lamang makaeskwela.

Dili usab hibaw-an nga sa unang ang-ang sa hayskol ni Noregim pagatauran siya og medalya sa iyang Papa Kardo uban sa iyang Mama Dina. Sa dihang nitaod na sa medalya si Papa niya Kardo, kalit lang nidaligdig ang mga luha sa kaapingan kay nalipay intawon siya nga nakataod sa medalya sa pinalangga niyang anak.

“Papa Kardo, mohilak na hinuon ka nga makataud sa medalya?” ni Noregim.

“Noregim, luha kini sa kalipay! matud ni Kardo nga namahid sa mga luha.

Nianang pagkabuntag sa adlaw’ng Domingo nisimba si Noregim kay nagpasalamat sa Ginoo nga natauran siya og medalya. Pagkahuman niya og ampo may nakita siya sa unahan atbang sa pultahan sa simbahan.

Ug nakurat si Noregim kay ang iyang Papa Kardo niduol kaniya. Wala siya makatuo kay sa pagbiya niya sa ilaha nanagat man kini.

“Noregim, pauli sa atoa”, ni Kardo nga bugnaw ang tingog.

Wala tuyua gibati og kakulba si Noregim, kay sa pagtan-aw niya sa unahan kalit lang nahanaw si Papa niya Kardo. Tuod man nahiuli na si Noregim. Apan nakalitan siya tungod kay daghang mga tawo ang naa sa ilang panimalay. Ug giduol siya sa iyang inahan nga nibakho sa paghilak.

“N---Noregim, patay na ang imong amahan,” pulong ni Dina.

“Mama Dina, nagkita pa gani mi kaganiha ni Papa Kardo sa simbahan”, matud ni Noregim.

“Noregim, nakasabot nako, nagpakita ang iyang kalag tungod sa imong kabuotan namatay siya atol gayod sa iyang pagpanagat”, pasabot ni Dina.

“Papa Kardo, kalit ba sa imong pagpanaw!”, pulong ni Noregim nga nibakho sa paghilak.

Pila may dagan sa panghitabo gikan sa pagkalubong sa iyang pinalanggang amahan, naningkamot og maayo si Noregim. Moeskwela mabuntag unya inig gabii mamasahero dayon gamit ang inabangan niyang trisikad. Ug sa adlaw’ng Sabado ug Domingo managat usab kini. Tungod sa iyang pagkakugihan gibuhat niya ang tanan aron lang intawon matuman ang iyang ginadamgong pangandoy sa kinabuhi.

Sa tanto sa pag-irog sa mga katuigan wala lang hibaw-i nga natuman na ni Noregim ang gipangandoy niya nga kurso nga mamahimong usa ka magtutudlo. Karon anaa na siya nagtudlo sa Cordova Public College (CPC), ang eskwelahan nga namat-an niya’g kahayag isip mamahimong tamdanan sa iyang mga pangandoy.

Daghan ang nidayeg kaniya kay iya man usab isugilon ngadto sa iyang mga tinun-an sa panahon nga vacant time niya ang iyang mga kaagi sa kinabuhi sa panahon nga nagtungha pa siya sa CPC nga dili magpakawala sa paglaom samtang nag-eswela pa sila.

Usa ka adlaw niana sa adlaw’ng Sabado usa sa iyang estudyante nga si Anabella naghuwat kini og trisikad. Wala madugay may usa ka trisikad nga nagpadulong kaniya. Ug sa wala damha ningsiga ang mga mata ni Anabella, kay ang driver sa trisikad mao man si Noregim nga iyahang maestro sa CPC.

“S-Sir ikaw....?”, ni Anabella nga daw dili makatuo sa iyang nakita.

“Oo, ako kini, nganong nakurat ka man?”, ni Noregim.

“Tungod kay dili ko makatuo!”, ni Anabella.

“Ang tinuod dili nako hikalimtan kung unsa ang akong kagahapon”, pasabot ni Noregim.

“Sir Noregim, para nako usa ikaw ka maestro nga sulundon”, saysay ni Anabella. (Kataposan)