Pinaskohan na lang

Wa ka ba maghunahuna nga kun wa pa nako sulati og demand letter imong amo, di ka kabayran sa imong separation pay? sukmat ni Atty. Nilo Capro ngadtong Rustico sulod sa bupete sa abogado. Naglikaylikay na si Rustico sa abogado pagkahuma’g dawat sa singkwenta mil pesos nga separation pay dala ang holiday pay, 13th month ug leave credits.

Gitaktak siya sa kompanya iyang gialagaran ug nagpatabang ni Nilo aron mabayran. “Mao lagi na akong naulawan nimo attorney. Kay wa gyu’y nahibilin sa akong nadawat. Nahurot nako’g bayad sa akong mga utang” ni Rustico nga nangluspad ug gipaningot bisa’g bugnaw ang aircon sa bupete.

“Di ba nagsabot ta nga kun kabayran ka’g 30,000, diyes mil ako. Unya karong P50,000 imong nadawat, zero man hinoon ko!” ni Nilo sa malaguton nga tuno. Nakapanglab-ok sa laway si Rustico. Nisamot kaluspad. Kay maskulado ang abogado. Ug si Rustico sapsing lang og lawas. Nagtutok lang si Rustico nga daw nagpakilooy sa abogado.

Nakasulod si Rustico sa bupete ni Nilo nga way appointment. Kay higala siya sa guwardiya sa building diin naa ang opisina sa abogado. Kay maayo’g relasyon si Nilo ug si Tristan, buotan sekyu, gitagad sa abogado ang kliyente. Nagpahimo og demand letter kay gitaktak siya nga way igong rason. Mahulog sa illegal dismissal. Nahadlok makiha ang amo ni Rustico. Gibayran siya.

Apan dihang wa pa siya kabayari, hapit kada adlaw nag-anhaan sa opisina sa abogado. Dihang nabayran na, wa na gyud nitunga. Si Tristan na lay gitugnan sa abogado nga makig-istorya siya ni Rustico. Nianha gyud si Rostico ning buntaga. Nagpinguy-pingoy.

“Di ba giingnan tika nga bisa’g pila na lay iregalo nimo sa abogado? Kay malipay man lang sab ko nga makatabang” ni Nilo. “Sorry, gyud kaayo, attorney. Wa man gyu’y nahibilin,” ni Rustico. Gigil-asan sa iyang gilingkuran. “Bisan na lang pag-ingon salamat, wa gyud ko nimo pahibaw-a pagkadawat nimo?” ni Nilo. Niduko si Rustico. “Sorry gyud kaayo attorney,” ni Rustico. Seryosong nangayo’g pasaylo.

“Nahala. Wa man gyud kahay para ako, lakaw na lang. Wa nay daghang istorya,” ni Nilo. “Pinaskohan na lang to nako, attorney. Hapit na mang pasko” ni Rustico. Nakaphiyom si Nilo. “Nalipay ko para nimo. Apan wa ko nalipay para nako. Kay wa man koy ako. Pero, sige. Ok, Merry Christmas na lang,” ni Nilo. “Merry Christmas, attorney” ni Rustico dayong gawas sa bupete.

Nakapanglingo si Nilo. Nipadayon sa iyang gitrabahoan sa computer. Nagpasalamat lang gihapon siya sa kahigayonan nga nakatabang og pobre. Kay sa hitsura lang, tataw gyud hinoon nga nagkalisodlisod si Rustico. (Kataposan)