Nagtanyag og temporaryong trabaho

Nagtanyag karon og temporaryong trabaho alang sa mga molupyo sa mga dapit sa Region 8 nga nakasinati og dakong kadaut sa pagkusokuso sa bagyong Yolanda niadtong Nobiyembre 8 niining tuiga.

Si Labor Secretary Rosalinda Baldoz maoy nagpahibalo niini kinsa miingon nga ang maong trabaho nga ilang gitanyag alang sa mga molupyo nga biktima sa bagyong Yolanda ubos kini sa Emergency Employment and Integrated Livelihood Program nga maoy mohatag og suweldo sa mga biktima nga makasulod sa temporaryong trabaho.

Dugang pa ni Baldoz nga naglakip sa mga trabahoon sa maong mga molupyo nga makaapil sa maong programa mao ang pag-ayo sa mga nangaguba nga pang-imprastraktura ug  ang paghawan sa mga nakaali sa kadalanan.

Matud pa ni Baldoz nga mokabat sa P50 milyones nga kantidad ang gigahin sa maong programa apan kasamtangan pa nilang gihapsay alang sa pag-ila sa mga molupyo nga biktima sa bagyong Yolanda nga makapahimulos sa maong programa. Gitataw niya nga ilang gitugyan ngadto sa mga lokal nga kagamhanan nga hingtungdan ang pag-ila sa mga  biktima nga makasalmot sa maong programa sa kagamhanan ug sila usab ang mohatag og giya sa mga gimbuhaton sa matag adlaw sa pagtabang sa pagbangon og balik sa nahagba nga kahimtang sa ilang pangagamhanan.

Si Baldoz miingon nga ang ilang buhatan sa DOLE andam gihapon sa pagdugang pa og pundong salapi sa ilang buhatan kun ugaling kini gayod ang gikinahanglan nga ilang pagakuhaon gikan sa ilang tinuig nga gahin sa 2014.

Sa nasayran nga ubos sa P2.268-trilyones nga gahin sa nasudnong kagamhanan alang karong tuig 2014 nga kasamtangan na karon nga giaprobahan sa second reading   sa ubos Balay Balaoranan. Ang maong programa sa kagamhanan maoy gipaabot karon sa katawhan nga biktima sa bagyong Yolanda tungod kay gawas nga gibanlas dili lang ilang kabalayan kun dili lakip usab ang tanan gayod nilang kabtangan.