Isla Paraiso - Gula 5

Ang hold-aper nga nagtindog sa duol ni sister Veronica mitutok kaniya. Wala makaharong sa tinan-awan sa hold-aper, miduko si sister Veronica. Gikulbaan siya. Ingon sa mitingkag ang iyang mga dalunggan nanglimbawot ang iyang mga balahibo.

“Ayaw kini hilabti,” matud sa hold-aper nga diha sa iyang duol ni sister Veronica. “Ang madre alang lang sa mga pari.”

Misamot ka kusog ang butok-butok sa dughan ni sister Veronica. Nakasabot siya sa meaning sa gisulti sa usa ka hold-aper.

“Kun dili ka,” tubag sa hold-aper nga didto sa iyang luyo, “ako na lang. Gusto kong motilaw og laing potahe sa madre.”

Niining higayona, naglungkaob na pag-ayo ang dughan ni sister Veronica. Wala siya masayod kun unsa’y iyang buhaton.

“Ayaw gani binuang diha, Brader,” matud sa hold-aper nga diha sa atubangan ni sister Veronica nagbarog. “Mitukar na sab tingali ang imong sakit sa pagka-manyak. Mosibat na ta. Tingali’g masakpan pa hinuon kita sa mga polis nianang imong kalaki.”

“Kadiyot lang, Brader,” matud sa kaubang hold-aper, “kadali ra kini.”

Ug midali pagduol ang hold-aper kang sister Veronica. Sa wala’y paglangan, gibunlot si sister Veronica sa salbahis nga hold-aper ug gikupogan paghalok. Nagkapuliki ang madre sa pagpanagang ug paglikay sa ngabil sa hold-aper nga gidumol niini sa iyang mga ngabil. Milugnot siya. -- Sumpayan pa