Soul mate

Dihang nakasakay na’g traysikol si Daisy karong buntaga, gipakli ug gibasa niya iyang dalang bag-ong Banat News. Horoscope iyang gibasa. Nga nag-ingon, mahimamat niya karong adlawa iyang suol mate. Nakapahiyom siya.

Kay dili kaayo siya motoo ini. Apan ganahan lang siyang masayod kun unsa’y gitag-an sa iyang kapalaran batay sa mga bitoon. Moadto lang siya sa munisipyo sa ilang lungsod kay magsusi kun tinood ba nga may job fair.

Dili maanyag si Daisy. Tambokon siya. Dili siya matawag nga dunay pleasing personality. Apan buotan siya. Kugihan. Gustong makatabang sa iyang mga ginikanan. Kay kabos lang sila. Iyang papa, drayber og dyip de-pasaheroan. Iyang mama, usahay modawat og labada. Apan kapuyan.Kay sa ilang pito ka managsoon, daghan na daang labhanan sa ilang mga sininang bulingon.

Kinamaguwangan siya. Nakahuman nag kursong Secretarial. Nakahuman siya pinaagi sa pag-working student. Libre siya sa tuition fee. Maong nalipay iyang mga ginikanan nga di sila dako’g gasto sa iyang pagtoon.

Nangaplay na siya’g trabaho sa mga buhatan. Pribado man o gobiyerno. Sa iyang tan-aw kwalipikado na siya. Kay abilidad ang hisgutan, kusog na siyang momakinilya, sa computer o electric o manual typewriter. Kamao sab siya og stenography. Apan mao lagi. Pleasing personality gyud ilang gipangita. Hapit na siya moaplay na lang pagka-maid. Apan nabuhi iyang paglaum pagkasayod nga may job fair sa ilang lungsod.

Laraw niya nga adto sa luyo sa munisipyo sa Tungkao agi. Sa dihang mosulod na unta siya sa luyong pultahan, kalit may nipaka-paka sa dapit sa iyang too. Ubos sa bintana sa CR sa lalaki, nagtuyok og kusog ang exhaust fan sa CR. May nagbutang og folder, libro ug diary sa bildo nga diyilosi ibabaw sa exhaust fan. Nasuyop sa fan ang panid sa folder. Ug nahulog sa bintana ang libro ug diary. Nakita ni Daisy ang hamtong lalaki nga nilili sa bintana, aron pagsusi kun diin natagak ang iyang libro ug diary. Abtik nga nilihok si Daisy.

“Huwata lang sir. Akong puniton ug itonol nimo” ni Daisy.

“Salamat kaayo Day” dakong pasalamat sa lalaki nga nagbarong pagdawat sa iyang diary ug libro.

Unya sa lobby sa munisipyo, nagkahimamat sila.

“Ako si Atty. Ben Bigwak. Salamat kaayo nimo ha. Sa imong kaabtik” niya pa nga mapahiyomon.

“Way sapayan sir” ni Daisy. Nipahiyom sab.

“Pahibaw-a unya ko kun magtoo kang duna koy ikatabang nimo ugma damlag” sa abogado. Nitunol og tarheta ni Daisy. Gidawat niya.

“Nangita lagi ko’g trabaho, sir” ni Daisy. Nagminghoy.

“Unsa may nakamahuan nimo?” sa abogado.

“Computer, typewriter ug esteno” ni Daisy.

“Mao ba? Adtoa ko sa opisina ugma sa buntag. Sugod dayon ka” sa abogado.

“Wa diay kay sekretarya, sir?” ni Daisy.

“Bag-o lang naminyo og German. Gidala sa Germany. Tayming kaayo ka” sa abogado. “Unya? Ok ra ko? Di man ko pleasing personality?” ni Daisy. “Ok kaayo ka. Kay selosa akong asawa” sa abogado. Niisa sa iyang toong kumagko ala FVR.

“May market pa gyud diay sa boss nga may selosang asawa, ang sama namo” tuaw ni Daisy sa hilom. “8:00 o’ clock sharp, ugma manoktok kos imong opisina,” ni Daisy. “See you tomorrow” sa abogado dayong saka sa hagdan padulong sa MTC sa ikaduhang andana sa munisipyo. Og kaloksohon si Daisy sa kalipay. Nagdali siyang mipara og traysikol. Aron pagpahibawo sa iyang ginikanan ug mga igsoon sa maayong balita. Ang suol mate dili diay kinahanglan may romantiko nga relasyon. Puwede ra diay higala. Sama sa usa ka employer o amo. Kinsa may magdahum nga mahulog sa bintana iyang diary ug libro?(Katapusan)