Dili sa pulong lamang

Daghan ang nakadayeg kang Arman. Sulod lang sa lima ka tuig niyang pagpasakop sa usa ka relihiyusong kapunongan sa Katoliko, nakat-onan na niya ang mga pulong sa atong Ginoong Diyos. Namanso na niya ang nagkalainlaing tema diha sa kamahinungdanon gayud diay sa atong pagpakighiusa kang Hesukristo.

Halos, nasag-ulo na niya ang mga bersikulo sa Bibliya. Kanunay na siyang kuhaon isip speaker sa bisan unsang religious conference ug daghan ang misaludo kaniya sa kahanas niyang mopaambit sa bisan unsang tema diha sa Bibliya. Namaster na usab niya ang pagpaambit sa inadlaw’ng ebanghelyo ug kadaghan na siya maalaan nga usa ka pari.

Sa matag formation class ug general prayer meeting, kinasingkasing ang pagpasabot ni Arman ngadto sa mga miyembro sa ilang relihiyusong kapunongan ang kamahinungdanon sa pagkat-on sa pulong sa Diyos ug ang pagsunod sa kasugoan niini.

“Timan-i ninyo mga igsuon, higugmaon gayud nato ang atong Diyos labaw sa tanan. Ug higugmaon usab nato ang atong mga silingan sama sa paghigugma nato sa atong kaugalingon...!”

“Ihikling nato ang atong tagsatagsa ka mga garbo...!”

“Aron mahimong maayong disipulo sa atong Ginoo, kalimtan nato ang atong kaugalingon! Pas-anon ta ang atong mga krus ug mosunod kita kang Kristo...!”

“Higugmaon ug pasayluon ta ang atong mga kaaway...!”

Ingon niini ang kanunay’ng pagpasabot ni Arman kun mahimo siyang formator ug speaker sa bisan asang relihiyusong panagtigom nga siya gidapit.

Apan sa kaugalingon niyang pamilya, kanunay’ng masugatan ni Arman ang pagpahinumdom kaniya sa iyang asawa nga makapaulbo sa iyang kalagot.

“Nganong kalit man lang ka masuko, Arman? Asa naman diay ang imong pagpaubos? Asa na man diay ang gipaambit mong nakat-onan sa atong relihiyusong kapunongan?”

“Nganong dili man ka makapasaylo sa manghod mong igsuon nga nakasala nimo ug sa atong mga silingan nga milibak nimo?”

“Nganong taas man kaayo ka’g garbo ug dili man ka gustong makoreksiyonan ang sayop mong binuhatan, Arman? Nagtuo ka nga tungod kay namanso na nimo ang Bibliya, husto ka na sa tanang higayon...?”

Daw naluya si Arman. Nalusno ang iyang kaugalingon nga naghunahuna karon sa matuod nga kahimtang sa iyang kaugalingon. Ug daw nanaginting karon sa iyang kaisipan ang mga pulong sa Ginoong Diyos nga nagpahinumdom kaniya:

“Arman, dili sa pulong lamang! Kun dili, nuntan nimo sa aksyon o buhat ang tanan, aron maisip kang usa ka modelo sa tanan ug mahimo kang usa ka maayong tinun-an diha sa akong parasan...!”

Ug natugkad karon ni Arman ang dako pa diay niyang kakulangan! (Kataposan)