Isla Paraiso

Gula 1

Misagitsit lang ang agi sa bus pasaheroan nga misutoy sa tumang katulin samtang nagsubay sa lapad nga dalan nga mitadlas sa kalungsoran sa lalawigan paingon sa dakbayan sa Sugbo.

Walay timik si Sister Veronica nga naglingkod sa luyo sa drayber. Daghan nang mga pasahero ang nakatulog. Apan si Sister Veronica wala mobati’g pagduka. Samtang nagdagan ang bus, nahanduraw niya ang kamabulokon sa iyang kinabuhi karon nga usa na siya ka madre.

Kapin na sa dose ka tuig ang nakalabay sukad sa iyang pagsulod sa kombento. Human mamatay ang iyang hinigugma, si Jonathan ingon sa nawad-an sa maayong direksyon ang iyang kinabuhi.

Ginayanaya ni Sister Veronica ang iyang kaugalingon sa maong hitabo. Iyang gialam-alaman ang iyang kaugalingon nga ingon gayod niana ang kinabuhi sa tawo dinhi sa kalibotan, may kalipay ug kasakit.

May laing lalaki nga mapailobon kaayong naghalad sa gugma niini ngadto kaniya. Sinati niya ang maong lalaki. Dugay na kining nanguyab kaniya. Mao kini ang higpit nga karibal ni Jonathan kaniadto sa iyang gugma. Human sa kamatayon ni Jonathan, mihalad kini pag-usab og gugma kaniya.

Gitun-an ni Sister Veronica ang iyang kaugalingon sa paghigugma kang Rey. Ambongan ang maong lalaki. Buotan ug masinaboton. Busa, sa hilom naninguha usab siya nga mapalambo sulod sa iyang dughan ang usa ka talagsaong pagbati alang sa ulitawo. Gusto niyang higugmaon si Rey. -- Sumpayan pa