Ang dakong balulang

Tungang gabii napugos og lakaw pauli gikan sa police office sa lungsod si SPO1 Guido Buralo kay naaberiya ilang patrol car gisulod pa sa talyer.  Upat ka kilometro ang gilay-on gikan sa Poblasyon, Badian ngadto sa ilang balay sa baryo Hinablan. Kinahanglang mopauli gyud siya kay di siya gustong mabuntagang nag-inusara sa ilang balay si Helen iyang kapikas nga mag-alanak sa ilang panganay.

Hinuon pabor ang panahon wa nag-ulan unya hayag ang dalan tungod sa takdol nga bulan. Isip usa ka pulis di siya mahadlok og tawong dautan. Kay armado siya apan may nadunggan siyang mga kahibulongang hitabo sa mga dalan sa Hinablan kun lawom nang gabii. Duna kuno’y mangabat o manghamok.

“Ah kun di ko kaagwanta’s kahadlok pabuthan gyud nako aron katimaho ko’g pulbora kay makapaisog man kuno ang baho sa pulbora,” hilom niyang panganti samtang naglakaw.

Niabot na siya sa likoan diin sa mga estorya daghang gihamok daw awaaw ang maong dapit. Kay dagko ug tag-as ang mga kahoy nga nanubo sa masig ka daplin sa karsada. duna say tag-as nga mga kawayan. Kulang sa hayag ang maong lugar kay layo sa poste ug di kalapos ang dan-ag sa bulan sa mga dahon sa kahoy.

Kalit may dako nga langgam nga nagkapakapa gikan sa tumoy sa kawayan naghaguros ang mga pako ug nahanginan ang nawong ni Guido. Daw usa ka pabo ang nitugpa sa iyang atubangan gikan sa tumoy sa kawayan sa walang habig sa karsada iyang gitutukan pag-ayo ang dakong manok nga sa iyang tan-aw usa ka dakong balulang.

Nibirig-birig ni Guido ang higanteng manok nigunit siya sa pul-an sa rebolber sa iyang hawak nibutokbutok iyang dughan.

“Iya iya lang tag panaw kay kun imo kong hilabtan basi’g masinabaw ka’g di oras!” ni Guido nga nikanga og diyotay.

Mora’g nakasabot ang balulang nipadaplin unya nisum-ok sa kalibunan nahanaw.

Apan lain gyud ang gibati ni Guido. Gipaningot siya. Nangluspad. Nakahukom siyang mopakyaw na lang og habalhabal sunod pauli og lawom nga gabii. Kay kinsa may magbuhi og dakong balulang? Kun di ang mga lalang lang sa kangitngit. (Kataposan)