Panon sa mga itik

Alas diyes sa gabii. Nanaug si Ruben sa Ceres bus iyang gisakyan tungod gyud sa tindahan sa iyang manghod nga si Denver. Duha iyang katuyoan dinhi sa Sitio Mandag-um, Matutinaw. Una moduaw sa mga lubong sa ilang ginikanan ug makighapihapi sa manghod, kay nidaug sa barangay election nga niagi. Nilansar si Denver pagkakonsehal. Nakadaug. Si Ruben kay tua nagnegosyo og karenderya sa siyudad, tagsa na lang mauli sa Badian.

Nagsugod nag panira ang tindahan paglusad ni Ruben sa bus. Unya paglarga sa bus, wa siya kapadaplin dayon kay dunay panon sa mga itik nga nangagi daplin sa karsada lugsong ngadto sa Matutinaw. Mga sobra usa ka gatos ka itik ang banabana ni Ruben. “Nganong gipamuhian man ni Denver iyang mga itik?” nakapangutana siya’s iyang kaugalingon.

“Gipamuhian lagi nimo imong mga itik?” ni Ruben ngadto’s manghod dihang nigawas na’s tindahan kay human nag panira ug nipadulong sa balay nga naa ra’s kilid sa tindahan sa walang habig.

“Haiy gipamuhian?” Wa na man koy itik. Gipamaligya na man nako sa niaging bulan. Natingob og palit sa nagdekarga. Kay itumod sa restawan sa siyudad nga hilig moluto og “Pekeng duck” ni Denver, naggunit sa yawe sa kandado sa tindahan.

“Ha? Bag-o pa man kong nakakita’g usa ka panon sa itik daplin sa karsada pagnaug nako sa bus ganiha!” ni Ruben.

Diin gud ang mga itik?” ni Denver nga naisang kilay. “Diha, daplin sa karsada. Dugay gud kong nakapadaplin kay gipahuman man nako ilang panon og agi nga mora’g nag-parade,” ni Ruben. Gitudlo ang shoulder sa karsada atubangan sa parkingan atubangan sa tindahan ni Denver.

“Daghan nang nakakita anang mga itika. Pero way moangkon nga tag-iya. Mag-agian kuno dinhi ma-alas diyes sa gabii. Nakakita sab diay ka?” ni Denver. Niabli sa gate sa ilang balay. Nisunod si Ruben.

“Karon pa kakita. Aw ganiha lang. Abi nako’g imo tong mga itik. Gibuhian,” ni Ruben.

“Mga itik na’s di ingon nato. Kay gisundan na’g kausa ni Nonoy ngadto’s ubos, nangahanaw man lang. Wa na man niya hikit-i’g diin gyung dapita o balaya nanghunong,” ni Denver.

Nakapanglingo si Ruben. Diha pa siya kulbai og diyutay. Kay dilikado’g nakatunob o nakapatid ba siya’g usa. Kuyaw’g kastigohon siya’s tag-iya. (Kataposan)