Ang bana nga basurero

Pwerting nakakaon ni Ibyak sa Chicken Joy sa Jollibee ug cake sa Red Ribbon nga gidalit ni best friend niya Ikyat sa paniudto, diha sa ilang talad kan-anan. Samoal gud.

Burot ang limogmogan. Mora’g mao pay pagkakaon niya sa maong matang sa mga pagkaon. O, gigutom lang gyud siya. Wa gyud hituk-i, uy. Kay moinom man pod dayon siya sa choco drinks nga gikan sa Brutos.

Wa damha ni Ibyak, ning makabusdik nga mga pagkaon. Tungod kay kining panimalaya usa lang ka barung-barong nga ginama  sa mga ginamit na nga kahoy, sin ug tarpulin.

Nakita niya kini sa dihang padung pa sila misud gikan sa wa tuyoang panagkita nila sa dagkotanan sa simbahan sa Sto. Niño.

Sud sa 15 ka tuig karon pa sila nagkakita pag-usab. Graduation kadto sa highs chool ang uwahi nilang panagkita.

“Unsa man diay okasyon dinhi, Day. Nga daghan mang mga pagkaon? Na bay nag-birthday ninyo, gabii?” matud ni Ibyak human manug-ab sa kabusog. “Wa may okasyon, Day. Mao gyud nay pagkaon namo kanunay, adlaw’ng tanan,” mauwawon nga tubag ni Ikyat.

“Bongga, tinuod ka, Day?” Maayo diay’ng trabaho imong bana, dako’g sweldo?” sigang mata ni Ibyak.

“Basurero ra gud, Day,” ni Ikyat, namid-ok.

“Ha? Unya mao ni pagkaon ninyo kada adlaw?” Wa na pod katuo si Ibyak. Nasuya siya kay iya ganing bana nga usa ka manager sa kompanya kausa ra sa usa ka buwan mamalit ining mga pagkaona.

“Dako diay’g kita imong bana, sa pagpamasura, Day? Kay nakapalit man ining mga pagkaona nga mahal mana?” ni Ibyak nga mihirit pa gyu’g ingkib sa cake ug inom sa choco drinks, bisa’g manag  panghingiki.

“Da, iya ra pong kinuykoyan gud!” matud ni Ikyat nga kakataw-onon. Kalit nga midigwa si Ibyak. (Kataposan)