Patay na ang mangtas

Gitapokan sa mga lumolupyo dinhi sa Silaw-Adlaw ang patay’ng lawas sa usa ka tiguwang. Nakaila sila niini ug kini mao si Paterno nga tighimo’g lungon dinhi sa sityo kun dunay mamatay. Ngilngig kaayo ang iyang kamatayon kay giputol ang iyang ulo ug hasta ang duha niya ka kamot ug giabis pa gyud ang duha ka dunggan.

“Ka way puangod sa naghimo niini,” ni Kapitan Sebyo nga mingislo ang nawong nga nagtan-aw sa lawas sa tiguwang. “Tiguwang pa gyud ang gibuno wala’y kahadlok og gaba...”

Miduol kaniya si Minok ug dunay gihunghong.

Midiyong dayon ang nawong sa Kapitan. “Ungo gud, tuo man mo ana. Wala na roy ungo uy. Kadtong nahitabo ni Tanciong nga gipatay nga naglutaw na sa dagat, paregla to ug kay dugay na sa dagat maong gipangaon sa mga isda ang tanang parte nga sulod sa iyang lawas, maong wala nay makita sa iyang mga tinai, atay ug kasingkasing...”

“Apan, Kapitan...”

“Ayaw mo’g tuotuo anang ungo-ungo, uy, naa ra na sa estorya sa sine, o di ba, mugnamugna sa mga inahan ngadto sa ilang mga gagmay’ng bata aron dili maglaaglaag ug sayo nang matulog...” ni kapitan Sebyo pa.

“Pero, ako Kapitan, motuo gyud ko’g ungo,” ni Minok pa dayong lakaw nga mora’g wala makagusto sa gisulti’s Kapitan.

Pagka-gabii, may gibalbal ug kini mao si Kapitan Sebyo. Nagubot ang tibuok balangay ug may nasigpatan silang usa ka tawo nga midagan gikan sa patay’ng lawas ni Kapitan Sebyo.

“Tua ra ang ungo!” Singgit sa mga tanod. “Atong lutoson!”

Ila dayong gilutos ang ungo. Apan wala gyud nila kini hiapsi. Pero si Paeng nga albularyo nagduda kang Kolas. Kay si Kolas pag-umangkon ni Paterno. Tuod, ilang giadto ang balay ni Kolas nianang pagka-gabii, apan wala pa gani sila makaabot sa may tugkaran gisugat na sila ni Kolas. Laksot na kaayo kini’g nawong ug milanog ang tingog niini. “Maayo kay nia mo! Hutdon ko kamo’g balbal! Si Tiyo Paterno gipatay ni Kapitan Sebyo nga dili man to siya usa ka mangtas nga ungo, kay ako maoy mangtasss!”

Ug kalit lang milukso si Kolas ug gipangpaak ang mga liog sa mga tanod. Ang iyang lihok sama gyud sa kusog sa kilat nga dali ra kaayong nakabugno sa lima ka mga tanod.

Pagka-ugma hipalgan ang lima ka patay’ng lawas sa mga tanod nga nakuniskunis ang kalawasan. Dihang giadto sa mga polis ang balay ni Kolas, wala na kini didto, may nakakita nga nagdala’g dakong maleta si Kolas ug nagdaling misakay sa usa ka sayong biyahe sa bus nianang pagka-kaadlawon human patya ang lima ka mga tanod. (Kataposan)