Maria Magdalena Gula 236

Wa pa nimo tubaga ang akong pangutana,” giingnan ko si Bob human sa among pagtagay sa lawasnong kalipay. “Unsay imong problema?”

“Gipangita na ko karon sa balaud. Dunay nakasulti nga kanunay kong magdala og shabu ug pusil. Duna nay warrant of arrest nga giisyu alang nako,” nagkanayon si Bob.

Naapektohan gyud ko sa problema ni Bob. Sukad niadto ako na ang nagsuporta sa iyang panginahanglan.

Paglabay sa usa ka semana, wala na motawag si Bob nako. Maoy akong pagtuo nga misibat na kini sa Sugbo ug atoa na kini magtagotago sa layong dapit. Mibalik og kaluag ang akong hunahuna kay wala nay misamok kanako.

Apan usa ka adlaw niana, dihang nagtan-aw ko og tv akong nasayran nga nadakpan si Bob. Paingon na siya motabok sa isla sa Bantayan. Nasakoti siya sa mga awtoridad dihang may nakaila kaniya, basi sa hulagway nga gipakatap dinhi sa tibuok Sugbo.

Paspas kaayong nanglabay ang mga adlaw alang kanako nga nakaginhawa sa kalisod sa akong situwasyon. Bisan ang gisaad ni Neggar nga petsa sa iyang pag-uli milabay na usab.

Milabay ang kapin sa duha ka semana ug wala pa si Neggar. Wala usab siya moteks kanako. Wala koy ideya kun nganong wala na magparamdam si Neggar. May nakasulti kaha kaniya bahin sa akong binuhatan? Apan iyaha kining balay nga akong gipuy-an. Niini, naghimo ko’g pakisusi. Akong nasayran nga may asawa ug usa ka anak diay si Neggar didto sa Butuan City. -- Sumpayan pa