Rest in Peace
Sa unang gabii sa haya ni Andy, nitunga dayon si Brenda hinigugma sa namatay. Nanghubag pa ang mga mata sa dalaga nga nagsud-ong sa lungon sa ulitawo.
“Kinsay nagpahibawo nimo sa hitabo?†ni Conrad, amahan ni Andy, nga niduol sa dalaga. Diha ra ang haya ni Andy sa sala sa ilang balay.
“Gahapon sulod sa Glady’s Emporium diin ko nag-alagad isip salesgirl, sige ko’g kadawat og teks. Balikbalik lang nga mga pulong. Abi nako’g komedya o binuang sa akong mga higala. Dili man diay,†ni Brenda.
“Unsa man diay pulong sa teks?†ni Conrad.
“Rest in peace. Rest in peace. Rest in peace. Balikbalik lang gyud makadaghan,†ni Brenda.
“Unsa man dayon imong gibuhat?†ni Conrad.
“Akong gitataw kun diin gikan nga selpon. Numero man ni Andy. Abi nako’g gikomedyahan ko niya. Akong gitawag iyang selpon,†ni Brenda.
“May nitubag?†ni Conrad.
“Wa gyud. Unya nagpakisusi na lang ko sa iyang mga higala ug kaubanan sa trabaho. Diha pa ko nasayud sa tinuod,†ni Brenda sa subo nga tunada.
“Imposible nga makateks siya nimo gahapon. Kay pagkadisgrasya niya sa motorsiklo sa niaging adlaw, guba kaayo iyang selpon. Nabuak. Ug wa na gyud siya ulii sa panimuot hangtud nakabsan sa kinabuhi,†ni Conrad. Subo sab kaayo’g tunada.
“Iya man gyung numero sa selpon akong nakita sa akong monitor o screen sa selpon. Akong gitawag. Kay di man motubag, nagpakisusi na lang ko,†ni Brenda. Gisud-ong niya’g usab ang nawong sa ulitawo sulod sa lungon. Daw nipahiyom kini.
“Lawas ra gyud ang mamatay sa tawo. Iyang kalag ang nangita’g paagi aron masayod ka’s hitabo,†ni Conrad. “Motuo gyud ko ana, Noy Conrad,†ni Brenda. Ug nilingi ngadto’s lungon.
“Apan Andy, ayaw baya ko’g hadloka, ha?†dugang ni Brenda. Dugay’ng nagtutok sa minatay. Naghulat nga moyango. Di ba kaha siya mahadlok kun moyango? (Kataposan)
- Latest
