Maria Magdalena

Gula 234

Apan wala gyud ko magpadala sa pangamoral ni Victor. Hangtod nga gitapos namo ang among panagsulti sa cellphone.

Wala gyud ko lung-i ni Victor. Wala’y adlaw nga dili siya manawag nako. Ang iyang tuyo bahin ra gyud sa gugmang gihalad niya kanako. Mora’g dili gyud siya modawat og balibad. Sa kapakyasan.

Dihang ingon sa gipul-an na ako sa pagsige niya’g samok-samok, gisugot na lang nako si Victor ug nahimong kami.

Ang among relasyon ni Victor wala’y kalainan sa akong relasyon sa laing mga lalaki.

Wala ko makabalibad dihang mihangyo siya nga magkita mi ug gidala ko niya sa usa ka mabugnaw’ng lawak. Didto gikatugyan ko kaniya ang akong pagka-babaye. Giangkon ko sa hingpit ni Victor.

“Usa kini ka dakong sayop, Victor,” giingnan ko siya human sa among pagtagay sa lawasnong kalipay.

“Ayaw paghunahuna’g ingon niana, Maria,” matud ni Victor. “Ang atong gihimo natural  lamang kini. Pareho kitang uhaw niini busa ato kining katungod nga malipay.

Wala na ko motingog.

Ug ang nahitabo namo ni Victor nasubli sa daghang mga higayon. Padayon nga nanglabay ang mga adlaw, ug hapit na mahuman ang gitambongan nga training ni Neggar. Mibati na ko og kakuyaw sa akong situwasyon.

Gusto na unta nakong bugtoon ang relasyon namo ni Victor apan wala siya mosugot. -- Sumpayan pa