Sharp shooter

Sa han-ay sa kapolisan sa siyudad, nainila ug nabantog sila si Tony ug Jean nga mga sharp shooter sa kalibre .45. Parehas sila nga nag-ranggo og mga inspector o lieutenant.

Daghan na silang nasulbad nga mga krimen sama sa tulis, hostage drama, ingon man sa paggukod sa mga notadong wanted nga mga kriminal, nga kun mosukol, dili gayod mosipyat sa mga bala sa ilang kalibre .45, nga way mga sibilyan nga mapagan.

Sila usab ang nailang tandem sa batan-ong opisyal nga mga pulis nga mga ulitawo ug dalaga sa edad nga 29.

“Gumikan sa bag-o ninyong kalampusan sa pagpusil patay sa duha ka notadong tulisan sa banko nga nakigpinusilay kaninyo human mang-hostage sa cashier ug sa manager sa banko, parehas nga i-promote ko kamong duha ngadto sa pagka-senior inspector o captain. Ug  parehas ko usab kamo nga i-asayen sa pagka-hepe sa tagsatagsa ka lungsod sa lalawigan...!” mao kini ang gipahibalo sa direktor sa kapolisan sa Rehiyon-7 ngadto nilang Tony ug Jean.

“Unta, manakod sa tanang kapolisan ang inyong pagka-sharp shooter sa kalibre .45!”

Gikan sa opisina sa regional director sa kapolisan, gipasakay ni Tony si Jean sa iyang serbis nga awto niadtong udtoha.

“Atomatik ang atong promosyon, Jean! Gikan sa pagka-inspector, nahimo na kita karon nga senior inspector...!”

“Bitaw, Ton! Ug gitagsatagsa tag asayen isip mga bag-ong  hepe sa lainlaing lungsod sa lalawigan sa Sugbo. Mabungkag na ang atong tandem sa kanunay’ng panagkuyog sa bisan asang misyon dinhi sa siyudad...!”

“Mas maayo sab nuon, Jean! Aron dili na gayud makahalata ang ubang mga opisyal ug kaubanan tang kapolisan sa sekreto tang panagdeyt human sa atong pag-duty, kay i-asayen na man tang duha ug mo-asumir na isip hepe sa kapolisan sa tagsatagsa ka lungsod...!”

“Opss....! Nganong gipaliko man nimo ning gisakyan tang awto sa usa ka motel.Ton...?

“Dugay na tang manag-uyab, Jean! Karon kay pulos na ta mga senior inspector, gusto ko nang gamiton ang akong pagka-sharp shooter sa akong gugma nganha nimo....!”

“Di ba nagsabot ta nga unya na ang tanan kun makasal na ta, ton....?”

“Di na ko makapaabot, Jean. Mitungtong na tas 29 ang edad! Gawas pa, syur na ang engrande tang kasal sa bulan sa Hunyo...!”

Migrahe dayon ang awto ni Tony sa usa ka lawak sa motel. Way nahimo si Jean, dihang giagbayan na siya ni Tony paingon sa sulod sa mabugnaw’ng lawak sa motel.

“Ning higayona, imatuod ko nimo, Jean, ang laing matang sa akong pagka-sharp shooter....!”

Igo lang nga gikusnit ni Jean ang kilid ni Tony. Silang duha gibati na usab og talagsaong kahinam sa natan-og na nilang relasyon sa usa’g-usa. (Kataposan)